Fýtboldan el quramasynyń Ulttar lıgasyndaǵy oıyn kestesi jarııalandy
2022 jylǵy 17 mamyr 16:23

Fýtboldan el quramasynyń Ulttar lıgasyndaǵy oıyn kestesi jarııalandy

NUR-SULTAN. QazAqparat – Fýtboldan Qazaqstan ulttyq quramasynyń ÝEFA Ulttar lıgasyndaǵy oıyndar kestesi jarııalandy, dep habarlaıdy QazAqparat tilshisi.

Qazaqstan fýtbol federatsııasy málim etkendeı, qazaqstandyqtar «S» dıvızıonynda Slovakııa, Ázerbaıjan jáne Belarýs komandalarymen synǵa túsedi.

Birinshi match 3 maýsym kúni «Astana Arenada» ótedi. Reseılik maman Magomed Adıevtiń shákirtteri Ázerbaıjan quramasyn qabyldaıdy.

Oıyn elorda ýaqytymen 20.00-de bastalady.

Úsh kúnnen keıin ulttyq qurama syrt alańda Slovakııamen oınaıdy. Match Trnava qalasyndaǵy «Anton Malatınskıı» stadıonynda ótedi.

Kezdesý Nur-Sultan ýaqytymen 6 maýsymnan 7 maýsymǵa qaraǵan túni saǵat 00.45-te bastalady.

10 maýsym kúni qazaqstandyqtar úshinshi matchyn Belarýs quramasymen ótkizedi.

ÝEFA atqarý komıtetiniń sheshimimen oıyn beıtarap aýmaqta Serbııanyń Novı-Sad qalasyndaǵy «Karadjorje» stadıonynda ótedi.

Ókinishke qaraı, stadıonnan oıyndy tamashalaýǵa jankúıerlerge tyıym salynǵan. Match elorda ýaqytymen 10 maýsymnan 11 maýsymǵa qaraǵan túni saǵat 00.45-te bastalady.

13 maýsymda qazaqstandyqtar Slovakııany qabyldaıdy. Kezdesý elorda ýaqytymen 20.00-de «Astana Arenada» bastalady.

Ulttar lıgasy toptyq kezeńiniń qorytyndy oıyndary kúzde bolmaq. 22 qyrkúıekte Qazaqstan quramasy Belarýs fýtbolshylaryn qabyldaıdy.

Al úsh kúnnen keıin syrt alańda Ázirbaıjan quramasymen oınaıdy.

Qazaqstan quramasynyń búkil matchtaryn Qazsport telearnasy tikeleı efırde kórsetedi.

Eske sala keteıik, budan buryn fýtboldan el chempıony «Tobyldyń» bas bapkeri qyzmetinen ketkenin jazǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT