Eýropalyqtar 2035 jylǵa qaraı elektromobılge kóshedi
2022 jylǵy 30 maýsym 14:58

Eýropalyqtar 2035 jylǵa qaraı elektromobılge kóshedi

NUR-SULTAN. QazAqparat - Eýropalyq Odaq óz óńirinde kóliktiń atmosferaǵa parnıktik áser týdyratyn gazdardy shyǵarmaýy kerek ekenine senimdi. Sondyqtan sársenbi kúni uıymǵa múshe elder 2035 jylǵa qaraı benzınmen nemese dızeldik otynmen júretin jańa kólikterdi satýdy toqtatýǵa kelisti, dep habarlaıdy QazAqparat Euronews-ke silteme jasap.

Olardy 13 jyldan keıin elektromobıldermen almastyrý josparlanyp otyr.

El azamattary buǵan oń pikir bildirdi, biraq keı pikirlerde birshama kúmán da bar.

«Bul qısyndy sheshim. Biraq men elektromobıl men elektr energııasy áldeqaıda arzan bolýy kerek dep sanaımyn. Eger olar baǵany túsirip, syıymdyraq jáne jeńilirek akkýmýlıatorlardy oılap taýyp, zarıadtaý núktelerin barlyq júrgizýshiler úshin qoljetimdi ete alsa, bul qısyndy sheshim bolýy kerek», - deıdi kólik áýesqoılarynyń biri.

«Meniń oıymsha, bul eshqashan durys jumys istemeıdi. Kádimgi motory bar meniń kóligime qarańyz. Biz onymen 3000 mıl júrdik jáne janarmaıdy az quıdyq. Al elektr energııasyn óndirý úshin elektr stantsııalary áli de qazba otynmen qamtamasyz etilýi kerek. Siz jaı ǵana máseleni basqa jerge jyljytasyz. Lastaný áli de bolady», – deıdi taǵy bir júrgizýshi.

Eýroparlamenttegi «Jasyldar» fraktsııasy ishten janatyn qozǵaltqyshtardy shyǵarýdyń aldaǵy kezeńin quptady. Germanııa depýtaty muny 5 jyl buryn jasaý kerek edi dep esepteıdi.

Eýropalyq Odaqqa múshe elder qorshaǵan ortany qorǵaý paketiniń basqa da negizgi elementteri boıynsha kelisti. Alaıda olar Brıýsseldiń bastapqy usynysyn jumsartatyn birqatar erekshelikter men túzetýlerdi qabyldady. Endi eýropalyq úsh bılik ınstıtýty – Parlament, Keńes jáne Komıssııa arasynda ǵalamshardaǵy klımattyń ózgerýine jol bermeýge arnalǵan osy kelisimdi bekitý úshin qatań kelissózder ótetini kútilip otyr.


Uqsas jańalyqtar

Jańalyqtar

Úrdis

MURAǴAT