Eýropalyq depýtattar asyǵys sheshim qabyldap otyr – Igor Rogov
2022 jylǵy 22 qańtar 00:00

Eýropalyq depýtattar asyǵys sheshim qabyldap otyr – Igor Rogov

NUR-SULTAN. QazAqparat – QR Prezıdenti janyndaǵy Adam quqyqtary jónindegi komıssııanyń tóraǵasy Igor Rogov Eýropalyq Parlamenttiń Qazaqstan jónindegi qararyna óz pikirin bildirdi, dep habarlaıdy QazAqparat tilshisi.

«Shynymdy aıtsam, depýtattar áli zańdy baǵasyn almaǵan oqıǵalarǵa saıası baǵa berip, asyǵystyq tanytty. Quqyq qorǵaý organdarynyń pikiri joq, birde-bir sot sheshimi shyqpaǵanyn da aıtpaı-aq qoıaıyn. Qazirdiń ózinde qandaı da bir gıpotetıkalyq formalarda sıpattama berilip jatyr. Birqatar quqyqtyq uǵymdar naqtylaý men jetildirýdi qajet etetinimen kelisemin. Olar «terrorızm» termınin keńinen qoldandy dep aıyptap otyr. Men de buǵan nazar aýdardym. Shynynda da, zańdy turǵydan alǵanda bul uǵymmen áli jumys isteý kerek shyǵar. Biz terrorızmge neni jatqyzýǵa bolatyny jóninde halyqaralyq, eýropalyq standarttardy bilgimiz keledi. Árıne, belgili bir qujattar túri bar ekenin túsinemin. Biraq, AQSh-ty uly demokratııalyq el dep esh sarkazmsyz, mysqylsyz aıta alamyn. Onda adamdar Kongress ǵımaratyn qarýsyz basyp alǵanda, ishki terrorıster degen ataý berildi. Olarda esh qarý bolǵan joq. Sondyqtan bul termınge esh qarsylyq tanytpaımyn. Dál osy jaǵdaıymyzda eýropalyq depýtattar qarý qoldanyp qana qoımaı, quqyq qorǵaý organdarynyń 19 qyzmetkerin óltirip, basyn kesip alǵandardy terrorıst dep atamaıtyny tańqalarlyq», - dep túsindirdi Igor Rogov.

Spıkerdiń pikirinshe, bizdiń quqyǵymyzda jetkilikti túrde pysyqtalmaǵan birqatar uǵym bar.

«Aıtaıyn degenim, bizdiń Konstıtýtsııa azamattarǵa beıbit demonstratsııalarǵa, qarýsyz pıketterge shyǵýǵa quqyq beredi. Bul oqıǵalardyń barlyǵy beıbit narazylyqtardan bastalǵanymen de kelisemin. Alǵashqy oqıǵalarǵa durys baǵa berildi, olardyń kóptegen talaptary ádil boldy, áıtpese ol talaptar qanaǵattandyrylmas edi. Beıbit sherý jappaı tártipsizdikke ulasqan kezde, jaqynda kóshedegi jastarǵa kólikten armatýra taratylǵany týraly vıdeo jarııalandy. Jańa quqyqtyq memlekettiń negizin salý úshin armatýralar taratylatynyna sený qıyn. Bul qarý ma, álde nemene? Beıbit narazylyq pa álde qarýly ma?»,- deıdi spıker.

Igor Rogov olardyń alańdaýshylyǵyn túsinetinin, biraq Eýroparlament depýtattary asyǵystyq tanytqanyn aıtty.

«Eger siz eldi nemese ózderińizge júginetin adamdardy qurmetteseńiz, resmı baǵalaýdy kútińiz, naqty bir aktiler bolýy kerek. Al qazir eshteńe joq. Olar Prezıdentti beıbit narazylyq bildirýshilerge oq jaýdyrýǵa buıryq berdi dep aıyptap otyr. Bul úndeýdi bárimiz oqydyq jáne estidik. Munda terrorıster týraly aıtylǵan bolatyn. Quqyq qorǵaý organdary men kúsh qurylymdarynyń qarý qoldana alatyn jaǵdaılary tikeleı jazylǵan zańnamalyq aktiler men zań bar. Adam quqyqtary jónindegi komıssııanyń tóraǵasy retinde bıylǵy alǵashqy otyrystardyń birin adam quqyqtary men bostandyqtaryn saqtaý máselelerine arnaıtyn shyǵarmyn. Onda adam quqyqtaryn qorǵaý, beıbit demonstratsııalar, sherýler quqyǵy jáne onyń eń qymbat qazynasy adam, onyń ómiri, quqyq qorǵaý salasyndaǵy quqyqtary men bostandyqtaryn saqtaý bolyp tabylatyn demokratııalyq quqyqtyq áleýmettik memleket uǵymymen baılanysty ekeni aıtylady. Eýropalyq depýtattar tártip saqshylarynyń ómiri basqasha dep sanaı ma? Konstıtýtsııada ár adamnyń ózin, jaqyndaryn qorǵaýǵa quqyǵy bar delingen. Qajetti qorǵanys uǵymy qylmystyq kodekste de jazylǵan», - dep túsindirdi Igor Rogov.

«Meni tań qaldyratyny – birneshe myń shaqyrym jerdegi eýropalyq depýtattar úzildi-kesildi baǵa berdi jáne tipti sanktsııa qoldanýdyń az-aq aldynda tur. Men Eýropa Keńesiniń ókilderimen sóılestim. Onda olardyń bizdiń quqyq qorǵaý organdarynyń qyzmetkerleri úshin beıbit sherýlerdi túsinýdegi eýropalyq standarttar boıynsha vebınarlar ótkizýge ýaǵdalastyq. Túrli elderdiń zańgerlerinen bostandyq pen mıtıngter týraly eýropalyq túsinikterdi talqylaý týraly usynystar tústi.

Prezıdenttiń quqyq qorǵaý organdarynyń bul oqıǵalarǵa daıyn emestigin aıtqany óte durys. Ol uıymdastyrýshylyq pen jabdyqtalýyn jáne jalpy daıyndyq máselesin aıtty. Meniń oıymsha, bizdiń quqyq qorǵaý júıesi «adam quqyqtary» sózin zańdyq jáne teorııalyq turǵydan túsinýge daıyn emes bop shyqty. Zańger retinde osy olqylyqtyń ornyn toltyryp, eýropalyq áriptesterimizdiń pikirin bilýimiz kerek dep sanaımyn», - dedi Igor Rogov.


Jańalyqtar

MURAǴAT