FÝTBOLDAN ÁLEM ChEMPIONATY-2022
  Jańalyqtar  >
  Astana

ESG standarttary memlekettik organdardy qyzmet ashyqtyǵyn arttyrýǵa yntalandyrady - mınıstr

2022 jylǵy 3 qazan, 18:17
ESG standarttary memlekettik organdardy qyzmet ashyqtyǵyn arttyrýǵa yntalandyrady - mınıstr

ASTANA. QazAqparat – Qazaqstanda ESG standarttaryn memlekettik basqarýǵa engizý boıynsha jumys kezeń-kezeńmen júrgizilip jatyr. Bul týraly «Astana» Halyqaralyq qarjy ortalyǵynda ótip jatqan ESG Investment Forum barysynda QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat.

Mınıstrdiń aıtýynsha, ESG qaǵıdattaryna tek qarjy sektory ǵana emes, memlekettik basqarý salasy da umtylýy kerek.

«Qazaqstanda ESG standarttaryn memlekettik basqarýǵa engizý boıynsha jumys kezeń-kezeńmen júrgizilip jatyr. Bolashaqta bul memlekettik organdardy óz qyzmetiniń áleýmettik salaǵa jáne qorshaǵan ortaǵa áser etý nátıjeleriniń ashyqtyǵyn arttyrýǵa yntalandyrady», - dedi Á. Qýantyrov.

UEM basshysy qazirgi ýaqytta Qazaqstannyń 2060 jylǵa deıingi kómirtegi beıtaraptyǵyna qol jetkizý strategııasynyń jobasy pysyqtalyp jatqanyn aıtty. Mınıstr múddeli taraptardyń pikirleri eskeriletinin jetkizdi. Qujatty aldyńǵy qatarly halyqaralyq standarttarǵa tolyq sáıkestendirý úshin aýqymdy jumys júrgizilýi qajet.

«Strategııada jumys oryndaryn qurýǵa jáne kómirtegi beıtaraptyǵyna ádil kóshýge erekshe nazar aýdarylady. Bul rette ekonomıkalyq damýdyń jańa modeli klımattyń ózgerýine turaqty bolýy tıis», - dep atap ótti mınıstr.

Strategııa ekonomıkanyń kóptegen áleýmettik aspektilerin qamtıtynyn eskere otyryp, ásirese klımattyń ózgerýine osal salalarda halyq pen bıznesti qoldaý tetikterin ázirleý qajet. Olardyń ishinde aýyl sharýashylyǵy men kómir ónerkásibin.

Sondaı-aq, mınıstr bıyl Qazaqstan Birikken Ulttar Uıymy alańynda Turaqty damý maqsattaryn iske asyrý boıynsha ekinshi Erikti ulttyq sholýdy tanystyrǵanyn eske saldy. Onyń basym baǵyttary: «Kedeılikti joıý», «Jaqsy densaýlyq jáne amandyq», «Taza sý men sanıtarııa» jáne «Laıyqty jumys pen ekonomıkalyq ósý».

Aıta ketsek, ESG standarttary qorshaǵan ortaǵa jaýapkershilikpen qaraýdy, joǵary áleýmettik jaýapkershilikti jáne korporatıvtik basqarýǵa qoıylatyn sapaly talaptardy qamtıdy. Keıingi jyldary bul qaǵıdattardy halyqaralyq qarjy uıymdary ınvestıtsııalyq sheshimder qabyldaý kezinde krıterıı retinde jıi eskeredi jáne álemdik qarjy naryqtaryna qol jetkizý dárejesine áser etedi.


Foto : gov.kz




Uqsas jańalyqtar
Seriktester jańalyqtary

Jańalyqtar