Erlan Qoshanov AMANAT partııasynyń tóraǵasy bolyp saılandy
2022 jylǵy 26 sáýir 15:51

Erlan Qoshanov AMANAT partııasynyń tóraǵasy bolyp saılandy

NUR-SULTAN. QazAqparat - AMANAT partııasy XXIII Seziniń delegattary QR Parlament Májilisiniń tóraǵasy Erlan Qoshanovty partııa tóraǵasy etip saılaý týraly usynysty biraýyzdan qoldady, dep habarlaıdy QazAqparat tilshisi.

AMANAT partııasynyń atqarýshy hatshysy Ashat Oralov sez delegattaryna QR Prezıdent Qasym-Jomart Toqaevtyń Erlan Qoshanovty partııa tóraǵalyǵyna saılaý týraly usynysyna daýys berýdi usyndy.

Daýys bergender Májilis spıkeriniń kandıdatýrasyn biraýyzdan qoldady.

«Qurmetti Erlan Jaqanuly, sizdi barlyq delegattar atynan AMANAT partııasynyń tóraǵasy bolyp saılanýyńyzben quttyqtaımyz», - dedi Ashat Oralov.

Aıta keteıik, Prezıdent Qasym-Jomart Toqaevtyń tóraǵalyǵymen AMANAT partııasynyń sezi ótip jatyr.

21 sáýirde partııanyń atqarýshy hatshysy Ashat Oralov Prezıdent osy jyldyń 26 sáýirinde kezekten tys XXIII Sezdi shaqyrý týraly sheshim qabyldaǵanyn habarlaǵan edi.

Oǵan barlyq óńirlerden delegattar qatysady. Sezd onlaın formatta ótedi. Sezd barysynda «ADAL» saıası partııasynyń «AMANAT» partııasyna qosylýy týraly másele qaralady dep josparlanǵan.

Budan buryn habarlanǵandaı, ótken aptada Memleket basshysy «Amanat» partııasynyń atqarýshy hatshysy Ashat Oralovty qabyldady.

Prezıdenttiń pikirinshe, partııanyń aımaqtyq fılıaldary osy máselede negizgi ról atqarýǵa tıis jáne óz deńgeıinde mazmundy qoǵamdyq dıalogty nyǵaıtýy qajet. Bıyl naýryz aıynda «ADAL» partııasynyń tóraǵasy Serik Sultanǵalı partııanyń AMANAT-qa qosylý sheshimin túsindirdi.


Seriktester jańalyqtary

Jańalyqtar

Úrdis

MURAǴAT