Erkin kúres sheberleri elordadaǵy Álem chempıonatyn sátti bastady

NUR-SULTAN. QazAqparat –Elorda tórinde kúres túrlerinen ótip jatqan lıtsenzııalyq Álem chempıonatynda búgin qazaqstandyq erkin kúres sheberleri jarysty sátti bastady, dep habarlaıdy QazAqparat tilshisi.

Erkin kúresten erler arasyndaǵy 65 keli salmaq dárejesinde úsh dúrkin Azııa chempıonatynyń jeńimpazy qazaqstandyq Dáýlet Nııazbekov alǵashqy beldesýinde taıpeılik qarsylasyn 10:0 esebimen utty.

Sondaı-aq, erkin kúresten 57 kelide beldesken taǵy bir otandasymyz Nurıslam Sanaev ta alǵashqy beldesýin jeńispen bastady. Ol birinshi beldesýinde moldovalyq Anatolıı Býrıannan 11:0 esebimen aılasyn asyryp, kelesi aınalymǵa ótti.

Al áıelder kúresinen búgin 68 kelidegi Irına Kazıýlına alǵashqy beldesýinde taıpeılik sportshydan basym tústi. Ókinishke qaraı, quramadaǵy jas balýandarymyzdyń biri 65 kelidegi Aına Temirtasova jarys jolynan shyǵyp qaldy. Ol jubanysh beldesýinde bolgarııalyq qarsylasynan 1:6 esebimen utyldy.

Elordamyzda ótip jatqan Álem chempıonatyn «Qazsport» telearnasy tikeleı efırde kórsetýde.

Aıta keteıik, búgin áıelder kúresinen 62, 68 keli, erkin kúresten 57, 65 keli salmaq dárejelerindegi fınalıster anyqtalady. Sondaı-aq, áıelder kúresinen 57, 59, 65 jáne 76 kelidegi jeńimpazdar men júldegerler belgili bolady.