Erdoǵan ormanǵa órt qoıǵandarǵa jazany kúsheıtý ıdeıasyn qoldady
2022 jylǵy 25 maýsym 15:35

Erdoǵan ormanǵa órt qoıǵandarǵa jazany kúsheıtý ıdeıasyn qoldady

NUR-SULTAN. QazAqparat – Túrkııa Prezıdenti Rejep Taıyp Erdoǵan orman órtin uıymdastyrýshylarǵa jazany kúsheıtý ıdeıasyn qoldady, dep habarlaıdy QazAqparat Anadolyǵa silteme jasap.

Birneshe kún boıy orman órtimen kúresip jatqan ońtústik-batystaǵy Mýgla provıntsııasynda jýrnalıstermen kezdesý barysynda Memleket basshysy Marmarıs týrıstik aımaǵyndaǵy órtten eshkim zardap shekpegenin jáne habar-osharsyz ketkender joq ekenin aıtty.

Aıtýynsha, órt aımaǵyna irgeles eldi mekenderden 435 adam evakýatsııalandy. Órtti sóndirýge 15 ushaq pen 46 tikushaq jumyldyrylǵan.

Prezıdent Dalaman, Fethııe, Keıchegız jáne Seıdıkemer aımaqtaryndaǵy orman órtterin baqylaýǵa alǵanyn jetkizdi.

Sondaı-aq, Túrkııa prezıdenti orman órtin uıymdastyrýshylardy jaýapqa tartý máselesine toqtalyp, mundaı áreketter úshin jazany kúsheıtý ıdeıasyn qoldaıtynyn bildirdi.

«Túrli oılar aıtylyp jatyr, tipti ólim jazasyn qoldaný týraly da. Bul máseleni talqylaý kerek dep oılaımyn», - dedi Erdoǵan.

Ol orman ǵana emes, janýarlardyń da jappaı qyrylyp jatqanyna nazar aýdardy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT