Jańalyqtar  >
  Almaty

Erbolat Dosaev Almaty qalasynyń ákimi bolyp qaıta taǵaıyndaldy

2022 jylǵy 2 jeltoqsan, 20:19
Erbolat Dosaev Almaty qalasynyń ákimi  bolyp qaıta taǵaıyndaldy

ASTANA. QazAqparat - Memleket basshysynyń Jarlyǵymen Erbolat Dosaev Almaty qalasynyń ákimi laýazymyna taǵaıyndaldy, dep habarlaıdy Aqorda.

Prezıdent Ákimshiliginiń Basshysy Murat Nurtileý Almaty qalasyna jumys saparymen bardy. Ol búgingi jumys sapary aıasynda Almatyǵa baryp, qalalyq máslıhattyń jıynyna qatysty.

Prezıdent Ákimshiliginiń Basshysy Almaty qalasynyń ákimi laýazymyna Erbolat Dosaev pen Bekqalı Torǵaevtyń kandıdatýralaryn usyný jónindegi Memleket basshysynyń hatyn oqydy. Ashyq daýys berý nátıjesinde 30 depýtat Erbolat Dosaevqa, 8 depýtat Bekqalı Torǵaevqa daýys berdi. Daýys berý nátıjesi boıynsha Erbolat Dosaev Memleket basshysynyń Jarlyǵymen Almaty qalasynyń ákimi bolyp taǵaıyndaldy.

Murat Nurtileý Erbolat Dosaevty qala ákimi retinde tanystyryp, onyń jaýapty basqarýshylyq qyzmet jolyn atap ótti. Prezıdent Ákimshiliginiń Basshysy ákimge Qasym-Jomart Toqaevtyń Almatyǵa jumys sapary kezinde naqtylaǵan mindetterin oryndaý ózekti ekenin jetkizdi. Atap aıtqanda, óńdeý ónerkásibin, týrızmdi, IT sektory men kreatıvti ındýstrııany damytý arqyly ekonomıkany ártaraptandyrý qajet.

Sonymen qatar Túrgennen Qaskeleńge deıingi Almaty taý klasterin damytý, avtomobıl joldaryn jańartý, jańa jumys oryndaryn ashý – basty mindetterdiń biri.

Jıynda Murat Nurtileý bıylǵy mańyzdy saıası oń ózgeristerge atsalysqan, qoldaý kórsetken qala turǵyndaryna Memleket basshysynyń alǵysyn jetkizdi.

Erbolat Dosaev 1970 jylǵy 21 mamyrda Almaty qalasynda dúnıege kelgen.

1987 jyly – Almaty qalasyndaǵy O. Jáýtikov atyndaǵy Respýblıkalyq fızıka-matematıkalyq mektep-ınternatyn bitirdi.

Almaty energetıkalyq ınstıtýtyn, Baýman atyndaǵy Máskeý Memlekettik tehnıkalyq ýnıversıtetin bitirdi.

1997 j. – «Turan Álem Banki» JAQ Basqarma Tóraǵasynyń orynbasary, «ATF Bank» JAQ Basqarma Tóraǵasy;

1998 j. – Qazaqstan Respýblıkasy Premer-Mınıstriniń keńesshisi;

1998 j. – Qazaqstan Respýblıkasynyń Energetıka, ındýstrııa jáne saýda vıtse-mınıstri;

2000 j. – Qazaqstan Respýblıkasynyń Qarjy vıtse-mınıstri;

2001 j. – Qazaqstannyń Damý banki Dırektorlar keńesiniń Tóraǵasy;

2001-2003 jj. – Qazaqstan Respýblıkasynyń Tabıǵı monopolııalar, básekelestikti qorǵaý jáne shaǵyn bıznesti qoldaý agenttiginiń Tóraǵasy;

2003-2004 jj. – Qazaqstan Respýblıkasynyń Qarjy mınıstri; Qazaqstandaǵy Eýropalyq qaıta qurý jáne damý bankiniń (EQDB) basqarýshysy; Qazaqstan Respýblıkasy Ulttyq Bankiniń Basqarma múshesi;

2004-2006 jj. – Qazaqstan Respýblıkasynyń Densaýlyq saqtaý mınıstri;

2006-2012 jj. «Qazınvestbank» AQ Dırektorlar keńesiniń Tóraǵasy;

2012 jylǵy 25 qyrkúıekten bastap – Qazaqstan Respýblıkasynyń Ekonomıkalyq damý jáne saýda mınıstri.

2013 jylǵy 16 qańtardan bastap – Qazaqstan Respýblıkasynyń Ekonomıka jáne bıýdjettik josparlaý mınıstri.

2014 jylǵy 6 tamyzda Qazaqstan Respýblıkasy Prezıdentiniń Jarlyǵymen (№ 880) Qazaqstan Respýblıkasynyń Ulttyq ekonomıka mınıstri bolyp taǵaıyndaldy.

2016 jylǵy mamyrdan bastap 2017 jylǵy tamyz aralyǵynda – «Báıterek» ulttyq basqarýshy holdıngi» aktsıonerlik qoǵamynyń Basqarma Tóraǵasy.

2017 jylǵy tamyzdan bastap 2019 jylǵy aqpan aralyǵynda Qazaqstan Respýblıkasy Premer-Mınıstriniń orynbasary laýazymynda jumys istedi.

2019 jylǵy 25 aqpanynan bastap 2022 jylǵy qańtar aralyǵynda – Qazaqstan Respýblıkasy Ulttyq Bankiniń Tóraǵasy.

2022 jylǵy 31 qańtarynan bastap Prezıdent Jarlyǵymen Almaty qalasynyń ákimi bolyp taǵaıyndaldy.


Uqsas jańalyqtar
Tegı:
Seriktester jańalyqtary

Jańalyqtar