Erbol Qarashókeev kóktemgi dala jumystaryna beriletin bıýdjet kredıtin ulǵaıtýdy surady
2022 jylǵy 12 qańtar 10:32

Erbol Qarashókeev kóktemgi dala jumystaryna beriletin bıýdjet kredıtin ulǵaıtýdy surady

NUR-SULTAN. QazAqparat – Úkimet otyrysynda QR Aýyl sharýashylyǵy mınıstri Erbol Qarashókeev kóktemgi dala jumystaryna bıýdjettik kredıtti ulǵaıtýdy surady, dep habarlaıdy QazAqparat tilshisi.

«Ótken jylǵy qurǵaqshylyq, sondaı-aq qosalqy bólshekter, janar-jaǵarmaı, mıneraldy tyńaıtqyshtar men pestıtsıdter baǵalarynyń kúrt ósýi aldaǵy kóktemgi egisti ýaqtyly daıyndaý jáne sapaly júrgizý úshin eleýli qıyndyqtar týǵyzýda. Osyǵan baılanysty, fermerlerge qoldaý kórsetý maqsatynda respýblıkalyq bıýdjetti naqtylaý kezinde kóktemgi dala jumystaryna bıýdjettik kredıtti ulǵaıtý múmkindigin qarastyrýdy suraımyz», - dedi Erbol Qarashókeev.

Onyń dereginshe, aýyl sharýashylyǵy taýaryn óndirýshilerdi kóktemgi dala jumystaryn júrgizýge naryqtyq baǵadan 15 paıyzǵa tómen baǵamen keminde 380 myń tonna arzandatylǵan dızel otynymen qamtamasyz etý máseleleri sheshilýde. Otandyq mıneraldy tyńaıtqysh óndirýshilermen aýyl sharýashylyǵy eńbekkerleriniń qajettilikterin tolyq qamtamasyz etý týraly ýaǵdalastyqqa qol jetkizildi. Tuqym, tyńaıtqysh pen pestıtsıd satyp alýdy sýbsıdııalaýǵa 2022 jyly 70 mlrd teńge kózdeldi.

«Oblystardyń derekteri boıynsha 2022 jyly aýyl sharýashylyǵy daqyldaryn 22,9 mln gektar alańǵa egý josparlanýda. Bul 2021 jylǵy deńgeıden 13,5 myń gektarǵa kóp. Oblys ákimdikteri agrotehnologııalardy saqtaý, ylǵal resýrstaryn únemdeý tehnologııalaryn qoldaný ólshemsharttaryn mindetti túrde saqtaı otyryp, olardy keńinen qoldaný arqyly qolda bar ylǵal qorlaryn saqtaý, uqypty paıdalaný sharalaryn qabyldaýy qajet. Jalpy kóktemgi dala jumystaryna daıyndyq josparly rejımde júrip jatyr», - dedi mınıstr.


Jańalyqtar

MURAǴAT