Eńbek jáne halyqty áleýmettik qorǵaý mınıstrliginde 2021 jyldyń jumysy qorytyndylandy
2021 jylǵy 31 jeltoqsan 10:37

Eńbek jáne halyqty áleýmettik qorǵaý mınıstrliginde 2021 jyldyń jumysy qorytyndylandy

NUR-SULTAN. QazAqparat - QR Eńbek jáne halyqty áleýmettik qorǵaý mınıstri Serik Shápkenov vedomstvonyń 2021 jylǵy jumysyn qorytyndylap, qazaqstandyqtardy kele jatqan 2022 jylmen quttyqtady, dep habarlaıdy QazAqparat mınıstrliktiń baspasóz qyzmetine silteme jasap.

«Qymbatty qazaqstandyqtar! Ótken 2021 jyl elimiz úshin 2020 jyly búkil álemdi dúr silkindirgen COVID-19 pandemııasynan keıin qalpyna kelýge baılanysty qıyn boldy. Pandemııamen jáne onyń saldarymen kúres Úkimetten indettiń taralýyn toqtatý jáne sonymen birge halyq pen el ekonomıkasy úshin eleýli teris áserdiń aldyn alý úshin buryn-sońdy bolmaǵan sharalar qabyldaýdy talap etti.

Bul rette, kúrdeli jaǵdaıǵa qaramastan, memlekettiń barlyq áleýmettik mindettemelerin oryndaý qamtamasyz etildi» - delingen Serik Shápkenovtiń úndeýinde.

Mınıstrdiń aıtýynsha, 2021 jylǵy 1 qańtardan bastap jasyna baılanysty zeınetaqy mólsheri 7% - ǵa, bazalyq zeınetaqy men memlekettik járdemaqy mólsheri 5% - ǵa ulǵaıdy.

Respýblıkalyq bıýdjetten zeınetaqy, memlekettik járdemaqy tóleýge, ataýly áleýmettik kómek pen memlekettik áleýmettik toptama berýge jalpy alǵanda 5 mln alýshyǵa 3,7 trln teńge baǵyttaldy.

«Aǵymdaǵy jyldyń 11 aıynda áleýmettik táýekelder bastalǵan kezde Memlekettik áleýmettik saqtandyrý qorynan tólenetin tólemdermen jalpy somasy 309 mlrd teńgege 1,1 mln adam qamtyldy.

11 aıda 198,1 myń otbasynyń 988,8 myń adamy ataýly áleýmettik kómekpen qamtyldy. Eńbekke qabiletti alýshylardyń 75%-y jumyspen qamtylǵan jáne jumyspen qamtýǵa járdemdesý sharalaryna tartylǵan. AÁK alatyn otbasylardan shyqqan 514,5 myń bala kepildik berilgen áleýmettik toptamalarmen qamtamasyz etilgen.

Áleýmettik saladaǵy 670 myń qyzmetkerdiń jalaqysyn kezeń-kezeńimen arttyrý jalǵastyryldy: bilim berýde – 25%, densaýlyq saqtaýda – 20-30%, áleýmettik qamsyzdandyrý salasynda – 50%», - dedi ol.

Mınıstrdiń keltirgen málimetine sáıkes, úshinshi toqsannyń qorytyndysy boıynsha halyqtyń nomınaldy tabysy ótken jyldyń uqsas kezeńimen salystyrǵanda 11,8% – ǵa, al naqty mánde – 3,6% - ǵa ósti. 2021 jyldyń úshinshi toqsanynda ortasha jalaqy 243,7 teńgege jetti, bul ótken jyldyń úshinshi toqsanymen salystyrǵanda 19% - ǵa joǵary. Bul rette ınflıatsııany eskere otyryp, naqty mánde jalaqynyń ósýi 8,8% - dy qurady.

Serik Shápkenovtiń aıtýynsha, halyqty jumyspen qamtý boıynsha úlken jumys júrgizilgen. Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasyn, Jumyspen qamtýdyń jol kartasyn jáne basqa da memlekettik baǵdarlamalardy iske asyrýdyń arqasynda jumyspen qamtýǵa járdemdesýdiń belsendi sharalarymen 1,3 mln. adam qamtyldy.

«Jumyssyzdyq deńgeıi 2020 jyldyń úshinshi toqsanyndaǵy 5%-dan úshinshi toqsanda 4,9% - ǵa deıin, al jastar arasyndaǵy jumyssyzdyq 4-ten 3,7% - ǵa deıin tómendedi.

2021 jyly memlekettik eńbek ınspektorlary qazaqstandyqtardyń eńbek quqyqtaryn qorǵaý boıynsha jumystardy belsendi júrgizdi. Qabyldanǵan sharalar nátıjesinde 23,1 myń jumyskerdiń aldyndaǵy jalaqy boıynsha bereshek ótelip, olarǵa 5,3 mlrd teńge tólendi», - dedi mınıstr.

Onyń aıtýynsha, byltyr múgedektigi bar adamdarǵa áleýmettik qoldaý kórsetý júıesin jetildirý boıynsha da úlken jumys júrgizilgen. 12 qazanda «Qazaqstan Respýblıkasynyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly» zań qabyldandy. Qujatta: múgedektiktiń I toby bar adamdardy kútý jáne olarǵa ilesip júrý boıynsha biryńǵaı járdemaqyny engizý; alynatyn járdemaqyny ulǵaıta otyryp, 7 jastan bastap balalardy múgedektik toptary boıynsha bólý; múgedektigi boıynsha jáne asyraýshysynan aıyrylý boıynsha bir mezgilde járdemaqy alý; múgedektigi bar balalardy tárbıelep otyrǵan otbasylarǵa turǵyn úı kezegin saqtaý kózdeledi.

«Nátıjesinde 15,1 myń adam I toptaǵy múgedek adamdarǵa kútim jasaý boıynsha járdemaqy aldy, 52,7 myń bala múgedektik toptary boıynsha bólindi, 2,8 myń adam bir mezgilde múgedektigi boıynsha jáne asyraýshysynan aıyrylý boıynsha járdemaqy alady.

Sondaı-aq, erekshe qajettilikteri bar adamdar turaqty turatyn nemese qyzmet alatyn medıtsınalyq-áleýmettik mekemelerdiń qyzmetin jetildirýge múmkindik beretin birqatar buıryqtarǵa ózgerister engizildi», - dedi Serik Shápkenov.

Mınıstrdiń habarlaýynsha, áleýmettik jáne kásibı beıimdeý maqsatynda respýblıkanyń barlyq óńirlerinde 19 «Ten Qogam» ortalyǵy jumys isteıdi. Áleýmettik ońaltý qyzmetterin keńeıtý úshin balalarǵa arnalǵan 6 shaǵyn jınaqty ońaltý ortalyǵy ashyldy.

«Mınıstrlik múgedektikti syrttaı anyqtaý boıynsha pılottyq jobany Qazaqstannyń barlyq óńirlerinde iske asyrýǵa kiristi. Medıtsınalyq-áleýmettik saraptama ıesizdendirilgen medıtsınalyq qujattardyń negizinde, syrttaı, kórsetiletin qyzmetti alýshy men kórsetiletin qyzmetti berýshi arasyndaǵy baılanyssyz júrgiziledi. Jobany sátti júzege asyrǵan jaǵdaıda ótinish berýshiler tek medıtsınalyq uıymǵa júginedi.

Budan basqa, áleýmettik-eńbek salasynda memlekettik qyzmetterdi alý rásimderin jeńildetý úshin mınıstrlik olardy tsıfrlandyrý boıynsha belsendi jumys júrgizýde. Búgingi kúni biz qyzmetterdiń 92% - yn tsıfrlaýdy qamtamasyz ettik, 45 qyzmettiń 41-i elektrondyq túrde kórsetiledi, olardyń 21-i belsendi», - dedi mınıstr.

Azamattardyń jumyspen qamtý salasyndaǵy múmkindikterin keńeıtý úshin Elektrondyq eńbek bırjasy portaly jumys isteıdi. Endi resýrsta jumyspen qamtý ortalyqtarynyń qyzmetteri qoljetimdi, kásibı baǵyttardyń keń spektri boıynsha onlaın kýrstar servısi iske qosyldy, jumys pen kadrlardy izdeý EAEO elderi sheńberinde «Shekarasyz jumys» jobasy sheńberinde múmkin boldy.

«Ótken jyly elimizdiń ıgiligi úshin jaýapty eńbek etip, ári qaraı onyń damýyna óz úlesin qosýǵa daıyn barlyq adamdarǵa alǵys aıtqym keledi. Aldaǵy jyl bizge jańa perspektıvalar ashady, ıaǵnı jańa mindetter paıda bolady.

Bizdiń mindetimiz – azamattardyń ómir súrý sapasynyń ózgerýine qol jetkizý. Buǵan tek birlesken qajyrly eńbekpen qol jetkizýge bolady. Bul bizdiń qolymyzdan keletinine senimdimin. Eńbek jáne halyqty áleýmettik qorǵaý mınıstrligi qyzmetkerleriniń jáne óńirlerdegi áriptesterimizdiń joǵary kásibıligi men eńbekqorlyǵy osyndaı senimdiliktiń negizi bolyp tabylady», - dedi ol.

Eńbek jáne halyqty áleýmettik qorǵaý mınıstri Serik Shápkenov qazaqtandyqtardy jańa jylmen quttyqtady.

«Qurmetti áriptester men otandastar! Sizderdi kele jatqan 2022 jylmen shyn júrekten quttyqtaımyn! Jańa jyl – árqaısymyz úshin erekshe mereke. Biz onymen óz ómirimizdegi jaqsy ózgeristerge, týǵan elimizdiń senimdi damýyna úmit artamyz.

2022 jyly halqymyzdyń ómir súrý sapasy odan saıyn artsyn, otbasy men rýhanı qundylyqtarymyz nyǵaıa tússin dep shyn júrekten tileımin! Keler jyl elimiz úshin jaqsylyq pen jasampazdyq jyly bolsyn! Barlyq qazaqstandyqtarǵa zor densaýlyq, ár shańyraqqa amandyq, baqyt pen mahabbat, qýanysh pen ózara túsinistik tileımin!» – dedi ol.


Jańalyqtar

MURAǴAT