Eńbek ótili men tájirıbesi joq jastar jumysqa qalaı ornalaspaq – sarapshy keńesi
2022 jylǵy 26 qańtar 23:24

Eńbek ótili men tájirıbesi joq jastar jumysqa qalaı ornalaspaq – sarapshy keńesi

NUR-SULTAN. QazAqparat – Elimizde jyl saıyn ýnıversıtet jáne kolledjden júzdegen túlek qanat qaǵady. Olarǵa ortaq másele, mamandyǵy men qalaýyna sáıkes jumys tabý. Osy oraıda jumyssyz jas mamandar ne isteý kerek? Qaıda júgingen jón? Atalǵan máselege qatysty «Atameken» ulttyq kásipkerler palatasy basqarma tóraǵasynyń orynbasary Oljas Ordabaev keńesin usyndy, dep habarlaıdy QazAqparat tilshisi.

«Bıyldan bastap Bilim jáne ǵylym mınıstrligimen birge kolledjderdegi bilim baǵdarlamasyn jetildirýdi qolǵa alamyz. Óıtkeni, zamanaýı naryq 4 jyl boıy ýnıversıtettiń túlegin kútip otyrmaıdy. Olarǵa maman qazir kerek. ıAǵnı kolledj nemese qysqamerzimdi kýrs bitirgenderdi izdeıdi. Osy oraıda kolledj basshylyǵy men onda bilim alyp jatqan túlekterdiń kózqarasyn ózgertý qajet. Ol degenimiz jumysqa sátti turý úshin ýnıversıtetti bitirý mindetti emes degen sóz», - dedi Oljas Ordabaev «Habar-24» telearnasynyń «Intervıý» baǵdarlamasynyń efırinde.

Sondaı-aq, ulttyq palata ókili dıplom alyp jumys taba almaı júrgen túlekter úshin qysqamerzimdi baǵdarlamalardyń baryn aıtty.

«Memlekettik «Eńbek» baǵdarlamasy bar. Qazir ol ulttyq joba aıasynda qaıta jandanyp jatyr. Qysqasyn aıtqanda, túlek eńbekpen qamtý ortalyǵyna júgine otyryp, bilim-biligin jetildirip nemese qaıta oqý kýrsynan óte alady. Jas túlekterge qatysty taǵy bir problema, eńbek ótili men tájirıbe bolmaǵandyqtan olardy eshkim jumysqa almaıdy. Osy oraıda «Jastar praktıkasy» jáne «Alǵashqy jumys orny» atty eki baǵdarlama bar. Oǵan qatysý úshin eńbekpen qamtý ortalyǵyna júginý kerek», - deıdi ol.

Odan bólek, efır qonaǵy atalǵan 2 baǵdarlamanyń paıdaly tustaryna toqtalyp ótti.

«Jumys berýshige jas túlekti praktıkaǵa alǵany úshin memlekettik sýbsıdııa alýyna múmkindik beriledi. Al jas maman óz kezeginde tájirıbe jınaıdy, ıaǵnı eńbek ótili júredi», - dedi tóraǵa orynbasary.

Buǵan deıin «Atameken» UKP ókili Qazaqstanda oqý bitirgen jastardyń jumys taba almaýynyń sebebin túsindirgen edi.


Jańalyqtar

MURAǴAT