Eńbek mınıstri: 30 myń er adam jumys istemeı, AÁK-pen kún kórýde

NUR-SULTAN. QazAqparat – Elimizde 30 myńnan astam er adam jumystan bas tartyp, balalaryna tólenetin ataýly áleýmettik kómek qarjysyna ómir súrýde. Bul týraly QR Eńbek jáne áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

Uqsas jańalyqtar

Almatyda 300 myńnan astam zeınetker «Belsendi uzaq ómir» ortalyǵyna barady

Túrkistanda «Kedergisiz keleshek» jobasy jandanady

«Jańa zań aıasynda tabysy tómen otbasylarǵa ataýly áleýmettik kómek taǵaıyndalady. Sonymen qatar, otbasynda eńbekke jaramdy adamdar bolsa, olarǵa jumys usynamyz. Eger de jumysqa qabiletti osy adam qyzmetten bas tartsa, onda AÁK búkil otbasyna tólenbeıtin bolady», - dedi mınıstr.

Osy oraıda, ol qoldanystaǵy zańnamada eńbekke jaramdy otaǵasy jumystan bas tarsa, búginde tek eńbekke qabiletti adamǵa ǵana qatysty áleýmettik kómek toqtatylatynyn eske saldy.

«Bizde usynylǵan jumystan bas tartatyndar óte kóp. Elimizde tepse temir úzetin 30 myńnan astam er adam jumystan bas tartyp, balalaryna tólenetin ataýly áleýmettik kómek qarjysyna ómir súrýde. Menińshe, bul jaǵdaı durys emes, er azamat jumys isteýi kerek. Atap aıtqanda, eger ol jumysqa tursa, onyń otbasyna beriletin AÁK tólemderi jalǵasa beredi. Jalpy, biz eńbekke jaramdy adamdardyń jaýapkershiligin arttyrýdy usynýdamyz», - dedi vedomstvo basshysy.

Bul turǵyda ol óńirlerge saparlary kezinde qandaı jaǵdaıǵa tap bolǵanyn aıtty.

«Eki aıdyń ishinde 15 óńirge baryp, halyqpen kezdestim. Osy oraıda kóptegen sharýa qojalyqtarynyń ókilderi adamdar usynylǵan jumysqa barmaı jatqanyn aıtty. Óıtkeni zaıyby 200 myń teńge ataýly áleýmettik kómek alǵandyqtan, otaǵasy 100 myń teńgeniń jumysyna kirýden bas tartýda. Túrkistanda aýqymdy qurylys júrýde, alaıda er azamattar 150 myń teńgelik jalaqyǵa barmaı jatyr. Sebebi, olardyń otbasyna 200 myń teńge somasynda AÁK tólenýde. Jalpy, eńbekke jaramdy otaǵasy jumys istegeni durys», - dedi B. Nurymbetov.