Jańalyqtar  >
  Qoǵam
Eńbek qaýipsizdigi: Dúnıejúzilik kongreste Qazaqstan tájirıbesi joǵary baǵalandy
2022 jylǵy 10 tamyz 17:08

Eńbek qaýipsizdigi: Dúnıejúzilik kongreste Qazaqstan tájirıbesi joǵary baǵalandy

Kez kelgen eldiń, qala berdi, onyń mekeme-uıymdary úshin adam ómiri men densaýlyǵy aldyńǵy orynda. Ár kompanııanyń sátti jumys isteýi de adamı faktorlarǵa baılanysty. Búginginiń bir shyndyǵy – eger basshylyq óz qyzmetkerleriniń densaýlyǵy men qaýipsizdigine nemquraıly qarasa, birde-bir bıznes sátti bolmaıdy.

Máselen, qarapaıym ǵana sheberhanany alaıyq. Sheberhana ishinde basqa kıetin qorǵanysh kaskasynyń bolmaýy, ashyq jatqan symdar, órt qaýipsizdigi erejeleri men yqtımal qaýipter týraly aqparattyń joqtyǵy qyzmetkerler densaýlyǵyna tikeleı qaýip tóndiretini anyq.

Bular týraly aıta berý mindetti emes ekeni de túsinikti, alaıda bul barlyq jerde birinshi kezekte iske asýy tıis talapqa jatady.

Osy mańyzdy máselelerdi tıimdi sheshý joldaryn qarastyrý úshin álemniń jetekshi elderi Kolýmbııanyń Kartahena qalasynda bas qosyp, eńbek qaýipsizdigi jónindegi ORP XXII dúnıejúzilik kongresin ótkizdi. Eńbek qaýipsizdigi salasyndaǵy eń mańyzdy jahandyq sharalardyń birinde ár el óz tájirıbelerimen bólisti.

Kongreske munaı-hımııa, barlaý-óndirý, tasymaldaý jáne logıstıka, kadrlardy daıarlaý jáne damytý, servıstik qoldaý, tsıfrlandyrý jáne basqa da salalarda jumys isteıtin 40 eldiń uıymdarynan 1 500-den astam delegat pen 100 sarapshy qatysty.

Atap óterlik jaıt, TMD keńistigindegi elderden tek Qazaqstan ókilderi shaqyryldy. Sebebi búginde elimizdiń kompanııalarynda «nóldik jaraqattaný» uǵymyn engizý jumysy qyzý júrip jatyr.

Ásirese, Qazaqstannyń «Vision Zero» álemdik tujyrymdamasyna qosylýy mańyzdy oqıǵa boldy. Tujyrymdama «nóldik jaraqatqa» qol jetkizýge baǵyttalǵan jáne úsh baǵytty biriktiredi: qaýipsizdik, eńbek gıgıenasy jáne qyzmetkerlerdiń amandyǵy.

Bul tujyrymdamanyń negizgi ıdeıasy – qaterlerge jol bermeýdiń belsendi mádenıetin qalyptastyrýdyń arqasynda óndiristegi jazataıym oqıǵalardy azaıtý jáne aldyn alý.

«Sharaǵa TMD memleketterinen qandaı elderdi shaqyrý týraly másele týyndaǵan kezde, biz birden Qazaqstandy tańdadyq. Elderińiz eń qysqa merzimde úlken tarıhı qadamdar jasady, bul eń mańyzdy qundylyqtar – qyzmetkerlerdiń densaýlyǵy men amandyǵyn nyǵaıtýǵa jáne ilgeriletýge múmkindik beredi. Ortaq túpki maqsatymyz – barlyq óndiris qyzmetkerleriniń úılerine aman-esen oralýy», - dep atap ótti Kásibı táýekelderdi boldyrmaý jónindegi halyqaralyq qordyń prezıdenti Hans-Horst Konkolevskıı.

Bul rette elimizdiń asa iri óndiristik kompanııalarynyń basyn biriktirýshi – «Samuryq-Qazyna» AQ kompanııalar tobyn erekshe aıtamyz. 2022 jyly Qor «Vision Zero» tujyrymdamasynyń qatysýshysy retinde tirkeldi.

Mamyr aıynda «Samuryq-Qazyna» AQ, QR Eńbek jáne halyqty áleýmettik qorǵaý mınıstrligi jáne Kásibı táýekelderdi boldyrmaý jónindegi halyqaralyq qor tarıhı úshjaqty memorandýmǵa qol qoıdy.

«Samuryq-Qazyna» Korporatıvtik ýnıversıtetiniń ESG/HSE sarapshysy Vıktor Podnebesnyı Qazaqstannyń ORP kongresinde halyqaralyq bastamaǵa qosylý protsesi týraly aıtyp berdi.

«Meniń prezentatsııam Qazaqstanda «Vision Zero» tujyrymdamasy aıasynda 5Z erejelerin engizý máselelerine arnaldy. Tujyrymdama bes nól erejelerine negizdelgen: jazataıym oqıǵalar, aýrýlar, lastaný, qysym kórsetý, bilimsizdik. Biz áli bastapqy kezeńdemiz, biraq álemdik bastamalarǵa belsendi qosylýdamyz. Soltústik jáne Ońtústik Amerıka, Eýropa, Ońtústik-Shyǵys Azııa elderiniń halyqaralyq uıymdarynyń kóshbasshylarymen kezdestik. Osyndaı sharalar aıasynda biz salanyń jetekshi sarapshylarymen óz tájirıbemizben bólisemiz. Onyń ishinde biz qazaqstandyq ekonomıkanyń draıveri retinde osy bastamalardy birinshi bolyp ıgerip, basqa otandyq kásiporyndarǵa úlgi kórsetip otyrǵan «Samuryq-Qazyna»AQ kompanııalar tobynyń úlesi týraly aıtyp otyrmyz», - dep atap ótti ol.

Onyń áriptesi, taǵy bir Korporatıvtik ýnıversıtettiń ESG/HSE sarapshysy Ashat Sarıev, «Qazaqstan temir joly» UK» AQ turǵysynda HSE mobıldi sheshimderin engizý taqyrybynda sóz sóıledi.

«Álem kóptegen sandyq sheshimderdi qajet etetin qıyndyqtarǵa tap bolýda. Biz qyzmetkerlerge qaýipti is-áreketterdiń aldyn alýǵa, bıýlletender alýǵa, tekserýler, saýalnamalar júrgizýge, jedel jelini jáne basqa da kóptegen fýnktsııalardy paıdalanýǵa múmkindik beretin ıntegratsııalanǵan mobıldi qosymshalary bar veb-platforma týraly áńgimeledik. Qazirgi ýaqytta paıdalanýshylar sany 100 myń adamdy qurady, bul barlyq qyzmetkerlerdiń 98%-in qamtıdy. Bizdiń joba Qor tobyndaǵy úzdik tsıfrlyq sheshim atanyp, sondaı-aq halyqaralyq temir jol odaǵynyń qatysýshylary arasynda ekinshi oryn aldy», - dep atap ótti sarapshy.

Kongreske qatysýshylar eń jaqsy qoldanylatyn tájirıbelerdi usyndy, sondaı-aq negizgi salalyq trendterdi aıqyndady.

Álemdik qoǵamdastyqta úlken qadamdarmen ilgerilep kele jatqan Qazaqstannyń tájirıbesin sharany uıymdastyrýshylar da, ár elden kelgen qatysýshylar da joǵary baǵalady.


Seriktester jańalyqtary

Jańalyqtar

Úrdis

MURAǴAT