Eńbek ınspektorlary adam saýdasy faktilerin tergeýde biliktiligin arttyrady

NUR-SULTAN. QazAqparat - Respýblıkanyń barlyq óńirlerinen kelgen memlekettik eńbek ınspektorlary «Qazaqstandaǵy adam saýdasy: eńbekpen paıdalanýǵa baılanysty isterdi anyqtaýdyń, tergeýdiń jáne sottarda qaraýdyń qıyndyqtary» taqyryby boıynsha oqytýdan ótýde, dep habarlaıdy QazAqparat.

Arnaıy kýrstardy QR Joǵarǵy sotymen, QR Іshki ister mınıstrligimen, QR Eńbek jáne halyqty áleýmettik qorǵaý mınıstrligimen, QR ІІM Qaraǵandy akademııasymen birlesip, AQSh-tyń Nur-Sultan qalasyndaǵy Elshiliginiń qatysýymen jáne qoldaýymen Quqyq qorǵaý organdary akademııasy uıymdastyrdy.

«Mundaı oqytý Qazaqstanda alǵash ret uıymdastyryldy. Qazzirgi kezde elimizdiń 6 óńiriniń memlekettik eńbek ınspektorlary arnaıy daıyndyqtan ótti. Bıylǵy jeltoqsan aıynyń ortasynda oqýdy barlyq oblystar men respýblıkalyq mańyzy bar qalalardyń memlekettik ınspektorlary aıaqtaıdy dep josparlanýda», - delingen Eńbek mınıstrligi málimetinde.

Esterińizge sala keteıik, Memleket basshysy bıylǵy Joldaýynda adam quqyqtaryn qorǵaý boıynsha jańa sharalar qabyldaýdyń mańyzdylyǵyn atap ótken bolatyn. Kún tártibinde memlekettik organdardyń úılestirilgen is-qımylyn talap etetin adam saýdasyna qarsy kúres tur. Prezıdenttiń aıtýynsha, quqyq qorǵaý organdary mundaı qylmystardy tergeý rásimin jaqsartýy kerek. Kináliler sot tártibimen qatań jazalanýǵa tıis.

Qazaqstanda adam saýdasyna qarsy is-qımyl boıynsha jumys 2003 jyldan bastap QR Úkimetiniń Adam saýdasyna baılanysty qylmystarǵa qarsy kúres, olardy boldyrmaý jáne aldyn alý jónindegi is-sharalar jospary aıasynda júrgizilýde.

Adam saýdasynyń qurbandary úshin arnaýly áleýmettik qyzmet kórsetý standarty 2016 jyly ázirlendi jáne adam saýdasynyń qurbandaryn anyqtaýdyń úlken úlesi bar óńirlerde: Qostanaı, Ońtústik Qazaqstan oblystarynda, Nur-Sultan jáne Almaty qalalarynda «pılottyq» rejımde engizildi. Odan keıingi jyldary Aqtóbe, Shyǵys Qazaqstan, Qaraǵandy, Qostanaı, Qyzylorda, Pavlodar, Soltústik Qazaqstan oblystarynda jáne basqa da óńirlerde adam saýdasynyń qurbandaryna arnaýly áleýmettik qyzmetter kórsetildi.

Eńbek mınıstrligi múddeli organdarmen jáne uıymdarmen birlesip, QR Úkimetiniń Adam saýdasyna baılanysty qylmystardyń aldyn alý, jolyn kesý jáne olarǵa qarsy kúres jónindegi 2021 – 2023 jyldarǵa arnalǵan is-sharalar josparyn ázirleıdi.