Eń tómen jalaqyny aýyl sharýashylyǵyndaǵy mamandar alady
2022 jylǵy 21 maýsym 13:23

Eń tómen jalaqyny aýyl sharýashylyǵyndaǵy mamandar alady

NUR-SULTAN. QazAqparat – Qazaqstandyqtardyń kóbi eńbek ónimdiligi tómen salalarda qyzmet etip júr. Mundaı málimetti QR Premer-Mınıstri Álıhan Smaıylov Májilis depýtattarynyń saýalyna bergen jaýabynda keltirdi, dep habarlaıdy QazAqparat tilshisi.

«Búgingi tańda jumyspen qamtylǵan halyqtyń kóbi aýyl sharýashylyǵy men qyzmet kórsetý sııaqty ónimdiligi tómen salalarda jumys isteıdi. Muny elde eńbek ónimdiligi tómen, aılyq az tóleýge bolatyn jumys oryndary ashylyp jatqanymen baılanystyrýǵa bolady», - dep jazdy Úkimet basshysy óz jaýabynda.

Onyń aıtýynsha, eldiń ekonomıkasyndaǵy eńbek ónimdiligi 1 adamǵa shaqqanda 8,2 mln teńge bolyp otyr. Biraq aýyl sharýashylyǵynda bul kórsetkish 3,3 mln teńge, qyzmet kórsetý salasynda 6,8 mln teńge bolyp tur. Al qaıta óńdeý salasynda 1 adamǵa shaqqandaǵy eńbek ónimdiligi 19,5 mln teńgege jetken.

«Aılyqtyń tómen bolýyna jumys kúshiniń biliktiligi tómen bolýy áser etýde. Osyǵan baılanysty jumys kúshiniń ónimdilik qabiletin arttyrý sharalary iske asyrylady. Al ol úshin ónimdiligi joǵary jumys oryndaryn kóptep ashyp, óńdeýshi salany jańa tehnologııalardy ıgerýge yntalandyrý qajet. Onyń áserinen birneshe tizbekke sozylyp, birneshe salany qatar damytady. Sonyń arqasynda aralas salalar damyp, ımport almastyrý, óndiristi tsıfrlandyrý jáne avtomattandyrý sharalary jedeldeıdi», - deıdi Álıhan Smaıylov.

Sońǵy málimet boıynsha, Qazaqstan otbasylary tabystarynyń 50 paıyzyn azyq-túlikke, onyń ishinde 46 paıyzyn tamaq satyp alýǵa jumsaıdy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT