Eljan Birtanovtyń ústinen qozǵalǵan qylmystyq is sotqa tústi
2022 jylǵy 17 qańtar 11:32

Eljan Birtanovtyń ústinen qozǵalǵan qylmystyq is sotqa tústi

NUR-SULTAN. QazAqparat – Burynǵy Densaýlyq saqtaý mınıstri Eljan Birtanovtyń ústinen qozǵalǵan qylmystyq is sotqa tústi, dep habarlaıdy QazAqparat tilshisi.

Bul týraly Nur-Sultan qalalyq sotynyń baspasóz qyzmeti málim etti.

«Qylmystyq is sotqa tústi. Búgingi tańda is sot óndirisine qabyldanǵan joq. Qylmystyq is júrgizý kodeksiniń normalaryna sáıkes, sýdıa kelip túsken is boıynsha 5 táýlik ishinde jalpy nemese qysqartylǵan tártippen basty sot talqylaýyn taǵaıyndaý ne isti aldyn ala tyńdaýdy ótkizý týraly sheshim qabyldaıdy. Ol týraly qosymsha habarlaımyz», - dep jazylǵan resmı málimette.

Eske salsaq, Nur-Sultan qalasynyń mamandandyrylǵan aýdanaralyq tergeý soty Eljan Birtanovty úıuamaqta ustaý merzimin 14 qańtarǵa deıin uzartqan bolatyn.

Onyń aldynda Qarjy monıtorıngi agenttigi burynǵy Densaýlyq saqtaý mınıstrine qatysty qylmystyq isti tergeý merzimi sozylatyny týraly aqparatty joqqa shyǵarǵan.

«BAQ jáne áleýmettik jelilerde burynǵy densaýlyq saqtaý mınıstri E.Birtanovqa qatysty tergeýde onyń kináli ekendiginiń dáleldemeleri joq bolýyna baılanysty qylmystyq isti tergep-teskerý merzimderin sozý týraly aqparat taratylýda. Bul aqparattyń aqıqat emestigin jáne onyń qoǵamda aǵymdaǵy jaǵdaı týraly qate túsinik qalyptastyrýǵa baǵyttalǵanyn habarlaımyz. Agenttiń qylmystyq isti tergeýdi osy jyldyń 7 shildesinde aıaqtady, bul týraly jurtshylyqqa birneshe ret aqparat berildi. Osy ýaqyttan bastap qorǵaý tarapy qylmystyq is materıaldarymen tanysýda. Tek sodan keıin is sotqa máni boıynsha qarastyrylýy úshin joldanady», - delingen agenttik habarlamasynda.


Jańalyqtar

MURAǴAT