+7 (701) 759 90 19
USD 384.63 EUR 427.98
RUB 6.08 CNY 54.68
Jańalyqtar

Elordany damytý týraly jıynda Prezıdent qandaı tapsyrmalar júktedi

2019 jylǵy 8 qazan 18:07
Bólisińiz:
Elordany damytý týraly jıynda Prezıdent qandaı tapsyrmalar júktedi

NUR-SULTAN. QazAqparat – Búkil álemge Nazarbaev modeli nemese Qazaqstan joly dep moıyndalǵan strategııa bastaý alǵan bas shaharymyz Nur-Sultan qalasy egemen elimizdiń negizgi ári asa mańyzdy jobasy sanalady. Qazirgi ýaqytta iri saıası-ekonomıkalyq, mádenı jáne bilim ortalyǵy bolyp qalyptasqan elordamyzǵa elimizdiń eń joǵary bıligi tarapynan da únemi jiti nazar aýdarylyp otyratyndyǵy da sondyqtan. Búgin Qazaqstan Prezıdenti Qasym-Jomart Toqaev elordany odan ary damytý máseleleri jónindegi májilis ótkizip, qalanyń birqatar problemasyna toqtalyp, olardy sheshýge baǵyttalǵan naqty tapsyrmalar bergen edi.

Uqsas jańalyqtar
QR Prezıdenti: Baıtaq jerimizdi mura etken babalar amanatyna adal bolý – paryzymyz Prezıdent: Volonter stýdentterdiń shákirtaqysyn ulǵaıtýǵa bolady Qazaqstandyqtar aptasyna kem degende 2 saǵatyn volonterlikke arnaýy tıis – Toqaev

Úleskerler muńy Memleket basshysyna jetti

Májilis barysynda Memleket basshysy elordada turǵyn úıdi paıdalanýǵa berý qarqyny men qurylys jumystary kóleminiń quldyraýy baıqalyp otyrǵandyǵyna alańdaýshylyq tanytty. «Elordamyz Nur-Sultan qalasynda turǵyn úılerdi salyp, paıdalanýǵa berý - búgingi kúnniń óte ózekti máselesi. Bul – asa ótkir áleýmettik problema. Osy turǵyda qarastyrý qajet. Kóptegen túsinik berýge bolady. Biraq, jasańdar!»,- dep eskertti Qazaqstan Prezıdenti.

Osydan keıin Memleket basshysy qala ákimi Altaı Kólginovke turǵyn úıdi paıdalanýǵa berý qarqyny men qurylys jumystary kólemin arttyrýdy tapsyrdy.

«Úleskerlik máselesi de jedel sheshýdi qajet etip otyr. Qalada 49 problemalyq nysan qalyp otyr. Olardyń qurylysynyń aıaqtalýyn 13 500 úlesker kútýde. Bul problemany sheshýge 2018-2019 jyldary 40 mlrd teńge bólindi. Biraq, nebári 4,5 mlrd teńgesi ǵana ıgerilgen. Buǵan qosa, ákimdik qosymsha 170 mlrd teńge suraıdy», - dedi Memleket basshysy.

Osy oraıda Memleket basshysy QR Bas prokýratýrasy men Іshki ister mınıstrligine úleskerlerdiń aqshasynan qaltasyna basyp halyqty zar qaqsatqan alaıaq qurylysshylardyń máselesimen naqty aınalysýdy tapsyrdy.

«Alaıaqtar túrmede otyrýy tıis. Óıtkeni, olar ózderiniń is-áreketterimen azamattarymyzdyń negizgi quqyqtaryna qastandyq jasap otyr. Azamattarymyzdy aldap, olardy dalada qaldyrady. Mundaı jaǵdaıda memleket te aralaspaı qalmaýy kerek. Áreket etińder de, baıandańdar!», - dedi Qasym-Jomart Toqaev.


Jalpy, jeke qarajatqa salynǵan turǵyn úılerdiń der ýaqytynda paıdalanýǵa berilmeýine olardyń ınjenerelik jelilerge qosylýyna kedergilerdiń bolýy da teris áserin tıgizip otyr. Máselen, «Premium Development Life Park» JShS salǵan úı qosylýy tıis elektr jelisi «Saryarqa« velotreginiń aýmaǵynda bolǵan. Al velotrek basshylyǵy kompanııany óz aýmaǵyna jibermegen.

»Velotrek basshylyǵy joǵary voltty jabdyqtar men kabelderdi «Astana REK» AQ-nyń balansyna berý qajettigin aıtqan. Osyndaı áýre-sarsańnyń saldarynan jeke qarajatqa salynǵan jalpy aýdany 30 myń sharshy metrdi quraıtyn 340 páterlik turǵyn úı 8 aı boıy paıdalanýǵa berilmegen. Bul – jol berýge bolmaıtyn jaǵdaı dep esepteımin. Bólingen ýchaske barlyq jelilerge qosylyp, daıyn bolýy tıis. Altaı Seıdiruly, ınjenerlik jelilerge qosylý máselesin tártipke keltirý qajet», - dedi QR Prezıdenti elorda ákimi Kólginovke qarata.

LRT daýy, qurylysy 9 jylǵa sozylǵan JEO

Qarajaty bankrotqa ushyraǵan «Astana» bankinde qalyp qoıyp, qurylysy irkilgen elordanyń jeńil relsti tramvaı qurylysy da Prezıdenttiń nazarynan tys qalǵan joq. Mundaı jobanyń bastapqy kezden-aq maqsatqa saı bolmaǵandyǵyn aıtqan Memleket basshysy Sybaılas jemqorlyqqa qarsy is-qımyl agenttigine bul isti tergeýdi jedeldetýdi tapsyrdy. Úkimet pen ákimdiktiń qolqalaýymen jáne halyqaralyq mindetteme bolǵandyqtan amalsyz júzege asyrý qajettigin de atap ótti.

«Mundaı jobany qalaı júzege asyrýǵa ruqsat berilgendigin múldem túsinbeımin. Úkimet pen ákimdikke LRT birinshi kezeńin aıaqtaýdyń naqty merzimin, ekinshi kezeńin aıaqtaýdyń kestesi men tetikterin anyqtaýdy tapsyramyn. Amal joq», - dedi Q.Toqaev.

Memleket basshysy elordada energetıka nysandary qurylysynyń der ýaqytynda aıaqtalmaý problemasyna da nazar aýdartty. Máselen, qurylysy 2010 jyly bastalǵan 3-Jylý elektr stansasy bıyl paıdalanýǵa berilýi tıis bolatyn. Biraq, iske qosý merzimi birneshe ret keıinge shegerildi. Endi jobalyq-smetalyq qujatyna túzetý engizilmek. Sonyń saldarynan joba 1,5 ese qymbattap otyr. Somasy da az emes, 40 mlrd teńgeden asyp jyǵylady. Al qaladaǵy jylý energııasynyń tapshylyǵy aıasynda úshinshi jylý elektr stansasynyń der ýaqytynda paıdalanýǵa berilmeýi bıznestiń damýyn baıaýlatatyndyǵy sózsiz. Buǵan qosa, qalanyń energetıkalyq júıesin «Saryarqa» gaz qubyryna qosýda túıtkildiń bar ekendigi anyqtalǵan.

«Bul – múldem túsiniksiz másele. Qalaı oryn alǵan? Osy jylǵa kózdelgen 2,7 mlrd teńge basqa óńirlerdiń arasynda qaıta bólinedi. Oǵan qosa, biz eń birinshi kezekte, dál osy elordany gazdandyrý jaıynda oılaýymyz kerek edi. Óıtkeni, qysta ne oryn alatynyn jaqsy bilesizder: qala tútinge oralyp, eń aldymen, turǵyndardyń, sondaı-aq dıplomatııalyq korpýs aldynda yńǵaısyzdyq týyndaıdy», - dedi Toqaev.


Qymbat azyq-túlik, sapasyz aýyz sý

Osydan birneshe jyl buryn QR Tuńǵysh Prezıdenti – Elbasy Nursultan Nazarbaev bas qalanyń turǵyndaryn arzan ári sapaly aýyl sharýashylyǵy taýarlarymen qamtamasyz etý úshin tıisti ákimdikter men vedomstvolarǵa astananyń azyq-túlik beldeýin qurý týraly tapsyrma bergen bolatyn. Bul baǵytta naqty jumystardyń júrgizilip jatqandyǵy da belgili. Alaıda ol qalaǵa oń áserin ázirshe tıgize alar emes. Dál osy máseleni búgingi májiliste kótergen Qasym-Jomart Toqaev Nur-Sultan qalasynda azyq-túlik jáne kúndelikti ómirge qajetti taýarlardyń baǵasy qymbat ekendigin aıtty.

«Nur-Sultan qalasynda azyq-túlik jáne kúndelikti ómirge qajetti taýarlardyń baǵasy qymbat ekenin aıtý kerek. Bul belgili másele. Mysaly un baǵasy eldegi ortasha baǵadan 18,2 protsentke, súzbe 17 protsentke, pııaz 14,5 protsentke, kúnbaǵys 9,6, sıyr eti 6,7 protsentke joǵary. Bul qalada tıisti ınfraqurylym jáne azyq-túlik beldeýi ornyqpaǵan degen sóz», - dedi Memleket basshysy.

QR Prezıdentiniń málimetinshe, elordada saýda oryndary tapshy. Uıymdastyrýshylar kóbine belgili bir saýdagerlerge ǵana múmkindik beredi. ıAǵnı, bárine birdeı jaǵdaı jasalmaıdy. Elorda ákimdigi men kórshiles oblystar arasyndaǵy baılanys óz deńgeıinde emes.

«Nur-Sultan qalasynyń ákimine Aqmola, Qaraǵandy jáne Pavlodar oblystarynyń ákimdikterimen birlesip, taýar óndirýshiler men saýda jelileri arasynda tikeleı baılanys ornatý máselesin retteýdi tapsyramyn», - dedi Q.Toqaev.

Osydan keıin QR Prezıdenti qala turǵyndary aýyz sý sapasy máselesin birneshe márte kótergenin, 20 qyrkúıekte áleýmettik jeli arqyly azamattar sýdan shyǵyp turǵan jaǵymsyz ıiske shaǵymdanǵanyn aıtty.

«Biraq, elordalyq taýarlar men qyzmetterdiń sapasyn jáne qaýipsizdigin baqylaý departamenti tarapynan túsindirý bir aptadan keıin, 27 qyrkúıekte ǵana boldy. Nelikten shuǵyl áreket etpeıdi? Bireýlermen jaýabyn kelise me? Basty másele elep-eskerý emes, bul máseleni sheshý. Bul da bizdiń sózderimizben qabyspaıdy ǵoı. Biz elordamyzdy basqasha maqtaımyz, al sýy basqa túrde múńkıdi», - dedi Memleket basshysy.

«Sergek» sergektik tanytpaı otyr

Qasym-Jomart Kemeluly elordadaǵy qylmystyq ahýalǵa da toqtaldy.

«Elordada beti ashylǵan esirtki qylmystary 7 paıyzǵa artqany baıqalady. Men Joldaýymda esirtki taratýmen jáne satýmen aınalysatyn tulǵalarǵa qatysty qylmystyq jaýapkershilikti kúsheıtý qajettigi týraly aıtqan edim. Taıaý ýaqytta Úkimet depýtattyq korpýspen birge zańnamamyzǵa tıisti ózgertýler engizedi dep kútemin», - dedi Meleket basshysy.

Qazaqstan Prezıdenti esirtki dılerlerin qatań jazalaý qajettigin basa aıtty. Sonymen qatar elordada jol apatynyń ulǵaıyp ketkendigine nazar aýdartty.

«Jol-kólik apattarynyń sany 15,5 paıyzǵa, olardan zardap shekkender 42 paıyzǵa kóbeıdi. Avtokólikterdi urlaý 20 paıyzǵa artty. Dabyl qaǵarlyq derekter. Quqyqqorǵaý organdary jaǵdaıdy jaqsartý boıynsha qajetti sharalardy qabyldaýǵa mindetti. «Sergek» jobasy qoǵamdyq qaýipsizdik deńgeıin arttyrý úshin tolyq kólemde paıdalanylmaıdy. Basymdyq júrgizýshilerden aıyppul óndirip alýǵa ǵana jasalyp otyr. Al ákimdik pen búkil Úkimettiń mindeti – bul búkil qalany tsıfrlandyrý», - dedi Q.Toqaev.

Sonymen qatar Memleket basshysy elordanyń qoǵamdyq kólikteriniń jetispeýshiligi, avtobýs baǵdarlarynyń buralańdyǵy, jaıaý júrginshiler ınfraqurylymyn damytý máselelerine de jan-jaqty toqtalyp ótti.

«Elorda turǵyndarynyń tórtten biri qoǵamdyq kóliktiń baǵdar kestesine kóńilderi tolmaıtyndyǵyn bildiredi. Sebebi, kóptegen buralań baǵdarlar jolǵa ketetin ýaqytty uzartyp jiberedi. Sonymen qatar elordalyqtar salondardyń tarlyǵy men lyq toly bolatyndyǵyn atap ótedi. Avtobýs baǵdarlarynyń júktemesi men suranysyna saraptama jasaý, júktemesi eń kóbin anyqtaý jáne ásirese qaýyrt ýaqytta olardy qosymsha avtobýstarmen kúsheıtý qajet», - dedi QR Prezıdenti.

Memleket basshysynyń atap ótýinshe, qalanyń kóptegen aýdanynda abattandyrylǵan jaıaý júrginshiler jolaǵy men ótpesi joq. Bul, jaıaý júrginshilerdiń ómiri men densaýlyqtaryna qater týdyrady.

«Shyndyǵynda mashınalar júrip jatady jáne adamdar kósheni qıyp óte almaıdy. Joldan júgirip ótip, jol qozǵalysy erejesin buzýǵa májbúr bolady. Sol arqyly ózine de, júrgizýshige de táýekel týdyrady. Barlyq órkenıetti qalalarda jaıaý júrginshilerge arnalǵan ótpeler bar. Sizder júrgizýshiler úshin jaǵdaı jasap, qala turǵyndarynyń qajettigine qamqorlyq tanytpaı otyrsyzdar. Mine, sondyqtan olar joldan júgirip ótedi. Sizder osyndaı durys jobalarmen aınalysyp, kópirler, ótpeler salyńyzdar. Jahandanýmen áýestenýdiń qajeti joq», - dedi Prezıdent.


QR Prezıdentiniń paıymynsha, Nur-Sultan ómir súrýge barynsha qolaıly, tórt qubylasy saı qala qaǵıdaty boıynsha damýy tıis. Qala ulǵaıǵan saıyn turǵyndardyń turmys sapasyndaǵy alshaqtyq ta artady. Tipti, joly jáne kommýnıkatsııasy joq, abattandyrylmaǵan jer telimderi ortalyq kóshelerge irgeles ornalasqan. Mıchýrıno, Internatsıonalnyı, Kúıgenjar turǵyn alaptarynda sýmen qamtamasyz etý, káriz jelileri áli kúnge deıin ortalyq júıege qosylmaǵan. Buǵan jergilikti turǵyndar narazylyq bildirýde. Qala shetindegi joldardyń 36 paıyzy nashar, asfalt tóselmegen. Sondyqtan kúrdeli jóndeý jumystaryn júrgizý qajet. Kóshelerdiń 20 paıyzdan astamynda jaryq joq. Mundaı keleńsizdik qylmystyń artýyna ákeledi.

«Úkimet pen ákimdikke qalanyń barlyq aýdandarynda ınjenerlik-kommýnıkatsııalyq ınfraqurylymdy damytý úshin tıisti sharalar qabyldaýdy tapsyramyn», - dedi Q.Toqaev.

Ǵımarattardy rásimdeýdiń dızaın-kody ázirlenedi

Qasym-Jomart Toqaev qalanyń syrtqy kelbetine qatysty da syn aıtty.

«Elordada qala qurylysynyń biryńǵaı saıasaty joq. Bul, birqatar aýdanda retsiz, beıbereket qurylystarǵa alyp keledi. Kósheler men ǵımarattardy rásimdeýdiń biryńǵaı úılesimdi stıli joq. Sizder elordany kórý úshin arnaıy kelgen týrısterdiń pikirlerin estigen de shyǵarsyzdar. Tolyqtaı alǵanda, olar árıne, oń pikirler. Biraq, qalada eklektıkanyń da joqtyǵyn atap ótedi», - dedi QR Prezıdenti.

Memleket basshysynyń paıymynsha, mundaı nysandarda jaılylyq bolmaıdy.

«Bir ǵımarat bir stılde, ekinshisi basqa stılde salynǵan. Eń bastysy, jaılylyq joq. Plıtalary ushyp, asfalt jarylyp jatyr. Jasyl óskin az. Jalpy, qalany qadaǵalap, kútip ustamaıtyndaı sezim qalyptasady. Qojaıyny joq», - dedi Q.Toqaev.

Prezıdent bul máseleni Elbasy Nursultan Nazarbaev ta birneshe márte aıtqanyn eske saldy.

«Alystan sáýletti ǵımarat jaman kórinbeıdi. Al jaqyn kelip qarasań, «sharshap» qalǵany kórinip turady. Qojaıyn kerek. Eń aldymen, aýdan ákimderi qojaıyn bolýy tıis. Olar kabınette otyrmaı, jaıaý júrip, turǵyndaryn, árbir ǵımarattyń tynys-tirshiligin, belgili bir ǵımaratta turyp jatqan adamdardyń ómirin bilýi qajet. Kabınette keshki saǵat 6-7-den keıin qajetti qujattarǵa qol qoıý úshin otyrýǵa bolady. Kesh bolmaı turǵanda qala kósheleri men ǵımarattaryn rásimdeýdiń biryńǵaı dızaın-kodyn ázirleýdi tapsyramyn. Bul meniń ákimdikke qatań tapsyrmam», - dedi Memleket basshysy.

Jıyn barysynda Nur-Sultan qalasynyń ákimi Altaı Kólginov, QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev, «Astana» halyqaralyq qarjy ortalyǵynyń basqarýshysy Qaırat Kelimbetov, QR Prezıdentiniń kómekshisi - QR Prezıdenti Ákimshiliginiń Ótinishterdi qaraýdy baqylaý bóliminiń meńgerýshisi Aıda Balaeva baıandama jasady.

Bizdiń kanalymyzǵa jazylyńyz:

Bólisińiz:

Avtor:

Marlan Jıembaı

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Bakytjan Erbasov
Bakytjan Erbasov
954-059
REDAKTOR
Janıbek Amangeldı
Janıbek Amangeldı
954-059

MURAǴAT