Elordalyq polıtseı blokbeketten júkti áıeldi shuǵyl perzenthanaǵa jetkizdi

NUR-SULTAN. QazAqparat – Elordalyq polıtsııa qyzmetkerleri aıaǵy aýyr áıeldi blokbeketten jedel túrde perzenthanaǵa jetkizdi. Bul týraly QazAqparat Polisia.kz saıtyna silteme jasap habarlaıdy.

Málim bolǵandaı, onyń kenetten tolǵaǵy bastalǵan.

«Búgin túnde Qosshydaǵy blok beketke ishinde aıaǵy aýyr áıel otyrǵan kólik keldi. Bekettegi Rústem Bolatov bosanatyn áıeldi patrýldik kólikke otyrǵyzyp, perzenthanaǵa jetkizip salý týraly jedel sheshim qabyldaǵan. Osy ýaqytta bekette kezekshi bolǵan Jol-patrýldik polıtsııasynyń mamandandyrylǵan batalony qyzmetiniń ınspektory Erlan Isaev aıaǵy aýyr áıeldi polıtsııa kóligine otyrǵyzýǵa kómektesti», - delingen aqparatta.

Polıtseı áıeldi 10 mınýt ishinde Rysqulbekov kóshesinde ornalasqan perzenthanaǵa jetkizgen. Ol perzenthanaǵa aldyn ala habarlasyp, jaǵdaıdy túsindirip aıtqan. Dárigerler áıeldi kútip otyrǵan.

«Jolda ýaıymdadyq. Ár sát biz úshin qymbat boldy. Men ómirimde birinshi ret osyndaı jaǵdaıǵa tap boldym. Jol boıy áıelmen sóılesip, ony tynyshtandyrýǵa kómektestim», - deıdi Erlan Isaev.

37 jastaǵy áıeldiń jetinshi sábıine aıaǵy aýyr. Onyń tórt uly, eki qyzy bar. Ol ýaqytyly kórsetilgen kómek úshin polıtsııa qyzmetkerlerine alǵys aıtty.

Erlan Isaevtyń ózi bes balanyń ákesi ekenin aıta ketý kerek. Bári oıdaǵydaı ekenine kóz jetkizgen polıtsııa qyzmetkerleri qyzmettik mindetterin odan ary atqarýǵa kiristi.