Elordadaǵy júıke júıesi buzylǵan balalar statsıonary jóndeýge muqtaj
2022 jylǵy 5 shilde 11:56

Elordadaǵy júıke júıesi buzylǵan balalar statsıonary jóndeýge muqtaj

NUR-SULTAN. QazAqparat - Májilis depýtattary elordadaǵy balalardy ońaltý ortalyǵyna bardy, dep habarlaıdy QazAqparat.

Elordadaǵy «Nurly júrek» áleýmettik qyzmet kórsetý ortalyǵyn qosymsha qarjylandyrý qajet.

Ǵımaratqa kópten beri kúrdeli jóndeý jumysy júrgizilmegen.

Sonymen qatar, qyzmetkerlerdiń jumysy aýyr bolǵandyqtan soǵan laıyqty joǵary tólemdi talap etedi.

Parlament Májilisiniń depýtattary, «AMANAT» partııasy fraktsııasynyń músheleri osyndaı sheshimge keldi.

«Nurly júrek» áleýmettik qyzmet kórsetý ortalyǵy psıhonevrologııalyq patologııasy bar 3 jastan 18 jasqa deıingi balalarǵa arnalǵan.

Bul jerde balalarǵa statsıonar jáne jartylaı statsıonar jaǵdaıynda arnaýly áleýmettik qyzmet kórsetedi.

Májilis depýtattary, «AMANAT» partııasy fraktsııasynyń músheleri Jamılıa Nurmanbetova, Larısa Pavlovets jáne Baýyrjan Sartbaev statsıonarǵa baryp, mekeme basshylyǵy jáne ujymymen kezdesti.

Munda halyq qalaýlylary erekshe balalar úshin qandaı jaǵdaı jasalǵanymen tanysty.

«Jóndeý jumystaryn júrgizip, jeldetý jáne beınebaqylaý júıelerin, órtke qarsy júıeni ornatý qajet. Sýmen jabdyqtaý máselesi de bar. Sonymen qatar, qyzmetkerlerdiń jalaqysyn kóbeıtý qajet. Bıyl 1 maýsymnan bastap olardyń jalaqy kóterildi. Bar bolǵany 30% ǵana. Bul shamamen 18-20 myń teńge. Qazir aýysymmen jumys isteıtin mamandar barlyq aýdarymdardy shegergennen keıin aıyna shamamen 180 myń teńge alady. Kúndiz jumys isteıtinder odan sál az. Olardyń jumysy óte qıyn, sondyqtan da jalaqyny odan da kóbeıtý kerek. Biz bul máselelerdi qala ákimdigi sheship berse deımiz», - dedi ortalyq dırektory Nurbol Zulqarnaev.

Májilis depýtaty Larısa Pavlovets «Nurly júrek» ortalyǵynyń túıtkildi máseleleri qysqa merzimde máslıhat pen qala ákimi aldynda kóteriletinin aıtty.

«Bul jerge kúrdeli jóndeý jumystaryn júrgizý qajet. Osyndaı ortalyqtardyń barlyq kabınetteri beınekameramen jabdyqtalýy kerek. Ókinishke qaraı, bilim basqarmasy men qalanyń áleýmettik qorǵaý basqarmasy buǵan nazar aýdarmaıdy. Qyzmetkerlerdi qaıta qarap, pedagog sanyn kóbeıtý kerek. Qazir bir muǵalimge 5-6 baladan keledi, alaıda bul jetkiliksiz. Bul ózgeristerdi júzege asyrý úshin metsenattarmen jáne eriktilermen de jumys isteý kerek, - dedi L.Pavlovets.

Ortalyqta kúrdeli jóndeýden bólek, medıtsınalyq jabdyqtar men sporttyq qural-jabdyqtardy jańartý qajet. Ol týraly májilismen Baýyrjan Sartbaev atap ótti.

«Munda kóp nárse eskirgen jáne jańartýdy qajet etedi. Qyzmetkerler alatyn jalaqy mólsheri az. Olardyń jalaqysy sońǵy ýaqytta 30 paıyzǵa ósti, degenmen bul aıtarlyqtaı jetistik emes. Jaqyn arada biz bul máseleni kóterip, óz tarapymyzdan qosymsha qarajat bólýge yqpal etemiz», - dedi ol.

Óz kezeginde Májilis depýtaty Jamılıa Nurmanbetova halyq qalaýlylary ınklıýzıvti qoǵam qurýǵa erekshe kóńil bóletinin atap ótti.


Seriktester jańalyqtary

Jańalyqtar

Úrdis

MURAǴAT