Elordada jylyna 10 myń júk mashınasy men arnaıy tehnıka shyǵarylmaq
2022 jylǵy 24 maýsym 18:16

Elordada jylyna 10 myń júk mashınasy men arnaıy tehnıka shyǵarylmaq

NUR-SULTAN. QazAqparat – «Astana – jańa qala» AEA ındýstrııalyq parki aýmaǵynda ornalasqan kásiporynda jylyna 10 myń júk mashınasy men arnaıy tehnıka shyǵarý kózdelip otyr. Bul týraly QR Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat.

«Astana – jańa qala» AEA ındýstrııalyq parki aýmaǵynda ornalasqan jobanyń jalpy quny – 8,8 mlrd teńge. Alǵashqy kezeńde kásiporynda jylyna 11 800 arnaıy tehnıkanyń bólshekterin qurastyrý, syrlaý jáne dánekerleý jumystary júrgizildi. Al, ekinshi kezeń tolyq iske qosylǵanda jylyna 10 myń tolyqqandy daıyn júk jáne mamandandyrylǵan tehnıka shyǵarý kózdelip otyr», - delingen QR IIDM baspasóz qyzmeti taratqan málimdemede.

2021-2025 jyldary júzege asyrylatyn jobanyń qazirgi tańda ekinshi kezeńin iske qosýǵa daıyndyq jumystary júrgizilip jatyr.

Baspasóz qyzmetiniń aqparatyna sáıkes ındýstrııa jáne ınfraqurylymdyq damý mınıstri Qaıyrbek Óskenbaev zaýyt jumysymen tanysty. Mınıstr kásiporynnyń ishki naryqty arnaıy tehnıkamen tolyqqandy qamtamasyz etip qana qoımaı, eksportqa shyǵarylatyn ónim kóleminiń artýyna da eleýli úles qosatynyna nazar aýdardy.

Sheteldik ınvestıtsııa tartý arqyly iske qosylǵan zaýyt qazir 250-ge jýyq adamdy jumyspen qamtyp otyr. Zaýytta kólik quraldaryn dánekerleý, boıaý jáne qurastyrý jumystary júrgiziledi. Sonymen qatar, arnaıy mamandandyrylǵan tehnıkalardyń testik synamalary da jınaqtalady.


Seriktester jańalyqtary

Jańalyqtar

Úrdis

MURAǴAT