Elordada mektepterge, kósheler men alleıalarǵa tarıhı tulǵalardyń esimderi berilip jatyr
2022 jylǵy 21 maýsym 18:03

Elordada mektepterge, kósheler men alleıalarǵa tarıhı tulǵalardyń esimderi berilip jatyr

NUR-SULTAN. QazAqparat – Elordada mektepterge, kósheler men alleıalarǵa tarıhı tulǵalardyń esimderi berilip jatyr, dep habarlaıdy QazAqparat.

Nur-Sultan qalasy Tilderdi damytý jáne arhıv isi basqarmasynyń basshysy Sáken Esirkeptiń málimetinshe, qazirgi tańda 30 kóshege, 3 alleıaǵa, 6 mektepke belgili tulǵalardyń esimderin, 7 kóshege jer-sý ataýlary berý jumystary uıymdastyrylýda.

Atap aıtsaq, qala mektepterine Keńes Odaǵynyń batyry, Avıatsııa general-maıory Talǵat Bıgeldınov, kórnekti memleket jáne qoǵam qaıratkeri Temirbek Júrgenov, Alash qozǵalysynyń beldi múshesi, qazaq poezııasynyń kórnekti ókili Maǵjan Jumabaev, Qazaqstannyń halyq jazýshysy, belgili aqyn Qadyr Myrza Áli, qazaqtyń áıgili kúıshi-kompozıtory, dombyrashy Táttimbettiń esimderi beriletin bolady.

Sonymen qatar quramdas bólikterge kórnekti memleket qaıratkeri Oral Muhamedjanov, memleket qaıratkeri Nurlan Balǵymbaev, Qazaqstannyń halyq jazýshysy, dramatýrg Safýan Sháımerdenov, Keńes Odaǵynyń Batyry Nurken Ábdirov, Qazaqstannyń halyq jazýshysy, memleket jáne qoǵam qaıratkeri Sherhan Murtaza, kompozıtor, sımfonııalyq kúı janrynyń negizin qalaýshy Erkeǵalı Rahmadıev, jazýshy Hamza Esenjanov, Qazaqstannyń halyq ártisi Quman Tastanbekov, jazýshy, ádebıet zertteýshisi Aqseleý Seıdimbek, qoǵam qaıratkeri, aǵartýshy, shyǵystanýshy, qazaqtyń alǵashqy Konstıtýtsııasynyń avtory Barlybek Syrttanuly, ádebıetshi, synshy Tursynbek Kákishev jáne t.b. tulǵalardyń esimderin berý týraly jumystar júrgizilip jatyr.

Budan basqa Abylaı han dańǵylynda, Dına Nurpeıisova eskertkishiniń janynda ornalasqan ataýsyz alleıaǵa «Qazaq eliniń kúıshileri men kúıshi-kompozıtorlarynyń alleıasy» ataýy, Qazaqstan Respýblıkasy Syrtqy ister mınıstrligi ǵımaratynyń aldynda ornalasqan ataýsyz alleıaǵa memleket jáne qoǵam qaıratkeri, pýblıtsıst, dıplomat – Názir Tórequlovtyń esimi beriletin bolady.

Aıta ketý kerek, qazirgi ýaqytta Nur-Sultan qalasynda ataý berilgen quramdas bólikterdiń jalpy sany – 1119, onyń ishinde dańǵyl – 17, kóshe – 789, qysqa kóshe – 309, tasjol – 4. 1997 jyldan beri búgingi kúnge deıin elordamyzdyń moraldyq turǵydan eskirgen 412 kóshesi qaıta atalyp, 456 jańadan paıda bolǵan quramdas bólikter ataýlarǵa ıe boldy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT