Elordada masalardy joıý naýqanynyń úshinshi kezeńi bastaldy
2022 jylǵy 23 maýsym 23:23

Elordada masalardy joıý naýqanynyń úshinshi kezeńi bastaldy

NUR-SULTAN. QazAqparat - Elordada masalarǵa qarsy dezınsektsııalyq jumystyń úshinshi kezeńi bastaldy, dep habarlaıdy QazAqparat.

Nur-Sultan qalasy ákimdiginiń málimetishe, maýsym bastalǵannan beri qorshaǵan ortany qorǵaý jáne tabıǵatty paıdalaný basqarmasy «Astanalyq dezınfektsııa» JShS-men birlesip aýmaqty óńdeý boıynsha 2 týr ótkizdi. Masalar men shirkeılerdiń jappaı kóbeıýin boldyrmaý maqsatynda qalanyń barlyq aýdanyndaǵy júzden astam taıaz sý qoımalary men batpaqty jerler óńdeldi.

«Úshinshi týr aıasynda ashyq statsııalardy (kvartalishilik aýmaq, kósheler, saıabaqtar, gúlzarlar, eldi mekender jáne t.b.) óńdeý bastaldy. Masalar ekojúıeniń bir bóligi bolǵandyqtan, olardy tolyq joıýǵa bolmaıdy biraq bul sharalar olardyń sanyn 90%-ǵa deıin joıýǵa jáne azaıtýǵa múmkindik beredi», - dep jazdy vedomstvodan.

Bul dezınsektsııalyq is-sharalar jándikterdiń sanyn azaıtýǵa baǵyttalǵan. Jumystar túngi ýaqytta – saǵat 21.00-den 04.00-ge deıin júrgiziledi jáne ár týr aıyna 20 kúnge sozylady. Barlyq óńdeý 6 týrǵa jalǵasady.

«Elorda turǵyndary men qonaqtarynyń jaıly demalýy úshin adam kóp jınalatyn oryndarǵa – saıabaqtarǵa, jaǵalaýlarǵa, gúlzarlarǵa jáne t.b. erekshe kóńil bólinedi. Bul jumysqa 150 dezınfektor, bıolog-entomologtar, 120 birlik motorly-rantsty búrikkish, termogeneratorlar, dezınfektsııalyq mashınalar, dezınfektsııalyq qondyrǵysy bar motoshassı jumyldyryldy», - dep tolyqtyrdy ákimdikten.

Dezınsektsııalyq is-sharalar kezinde saqtyq sharalaryn saqtaý mańyzdy. Ásirese, óńdeletin oryndarǵa barmaı, óńdeý kezinde terezelerdi jabý kerek.

«Dezınsektsııalyq jumystar úshin quramynda hlorpırıfos jáne malatıon áser etýshi zaty bar, adamdar men janýarlar úshin qaýiptiligi az ınsektıtsıdter qoldanylady. Bul preparattar Qazaqstan Respýblıkasynyń aýmaǵynda qoldanýǵa ruqsat berilgen tizilimge engizilgen», - delingen habarlamada.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT