Jańalyqtar  >
  Astana

Elordada qylmys sany azaıdy - Polıtsııa departamenti

2022 jylǵy 30 qarasha, 16:39
Elordada qylmys sany azaıdy - Polıtsııa departamenti

ASTANA. QazAqparat – Elorda aýmaǵynda jasalatyn qylmys sany azaıyp keledi. Bul týraly Astana qalalyq Polıtsııa departamenti bastyǵynyń orynbasary Ǵosman Jakın aıtty, dep habarlaıdy QazAqparat tilshisi.

«10 myń turǵynǵa shaqqandaǵy qylmys deńgeıi 139-dan 136 qylmysqa deıin azaıdy. Zorlaý, tonaý, qaraqshylyq, buzaqylyq qylmystarynyń sany tómendedi. Densaýlyqqa aýyr zııan keltirý, zorlaý, tonaý, ınternet-alaıaqtyq, tonaý syndy qylmystardy ashý kórsetkishi jaqsardy. 188 esirtki qylmysy anyqtaldy. Onyń ishinde esirtkini satýdyń 142 faktisi bar», - dedi ol Astana ákimdigi janyndaǵy qoǵamdyq keńes otyrysynda.

Onyń dereginshe, zańsyz aınalymnan 254 keli ártúrli esirtki zaty alyndy. Esirtki daıyndaýmen aınalysqan 6 zerthana joıylyp, ony jarnamalaıtyn 69 saıt buǵattaldy.

«Elordaǵa esirtki jetkizýdiń turaqty arnasy joıylyp, qala aýmaǵyna ony jetkizýdi jáne satýdy júzege asyrǵan uıymdasqan qylmystyq toptyń áreketine toqsaýyl qoıyldy. Qylmystyq toptyń uıymdastyrýshysy jáne 5 múshesi ustaldy. 37 keliden astam gashısh tárkilendi», - dedi Ǵosman Jakın.


Uqsas jańalyqtar
Tegı:
Seriktester jańalyqtary

Jańalyqtar