Elordada kúıshi-ustaz Aıtjan Toqtaǵannyń mereıtoılyq keshi ótti
2021 jylǵy 8 qarasha 01:15

Elordada kúıshi-ustaz Aıtjan Toqtaǵannyń mereıtoılyq keshi ótti

NUR-SULTAN. QazAqparat – «Astana Opera» opera jáne balet teatrynyń Kúlásh Baıseıitova atyndaǵy kameralyq zalynda kúıshi-dombyrashy, ustaz, folklortanýshy ǵalym Aıtjan Toqtaǵannyń «Kúı – ǵumyrym, ustazdyq – tuǵyrym» atty kontserti ótti, dep habarlaıdy QazAqparat tilshisi.

Jýyrda 75 jasqa tolǵan óner ıesine QR Mádenıet jáne sport mınıstri Aqtoty Raıymqulovanyń quttyqtaý haty tabys etildi.

Jyly lebizin bildirgen mınıstr: «Ultymyzdyń qara dombyrasynyń sheber oryndaýshysy ári nasıhattaýshysy, ustaz retinde jarqyn bastamalardy qolǵa alyp, sátti jalǵastyryp kelesiz. Qazaq tarıhynyń óner áleminde tylsymnan terbep kúı tókken Qurmanǵazy, Dáýletkereı, Abyl, Táttimbet, Baıserke, Dına, Súgir, Qazanǵap syndy Uly Dala daryndarynyń dástúrli jolyn jalǵastyryp, talǵampaz tyńdarmannyń júrek tórinen oryn aldyńyz», – dep ustaz eńbegin atap ótken. QR Mádenıet jáne sport mınıstriniń orynbasary Nurǵısa Dáýeshov sóz sóılep, alǵysyn jetkizdi.

Batys Qazaqstan oblysynyń ákimi Ǵalı Esqalıev joldaǵan quttyqtaýynda Aıtjan Esenulynyń kúı óneriniń bıikke sharyqtaýyna mol úles qosyp kele jatqany, ony óńir jurtshylyǵy Qurmanǵazy men Dına, Qalı, Mámen, Oqap syndy kúı alyptarynyń zańdy jalǵasy dep tanıtynyn jáne maqtan tutatynyn jazǵan.

Qurmanǵazy atyndaǵy Qazaq ulttyq konservatorııanyń rektory Arman Júdebaev: «Biz Aıtjan aǵanyń shákirtterimiz. Ol ómirin kúıge arnaǵan adam. Qazaq kúıin zertteýdi Ahmet Jubanov bastaǵan bolsa, Aıtjan aǵa – sol sara joldy jalǵastyrýshy. Búginde mýzyka mektepteri men oqý oryndaryndaǵy myńdaǵan shákirt Aıtjan Toqtaǵannyń kitaptarynan dáris alýda. Bul – ustazdyń baǵa jetpes eńbegi», – dedi. Odan keıin qolyna dombyra alyp, Qurmanǵazynyń «Tóremurat» kúıin oryndady.

QR eńbek sińirgen qaıratkeri, Aqtaýdan kelgen Rýhııa Batyrsheva ustazyna jyrdan shashý shashty jáne mańǵystaýlyqtardyń sálemi retinde Súgirdiń termesin oryndap berdi.

«Kúı anasy» qorynyń jetekshisi Tólegen Qýanyshev Aıtjan Esenulynyń ǵylymǵa tereń den qoıyp, ulttyq mýzyka salasyn jan-jaqty zertteýge jáne halyq kompozıtorlary bastaǵan kúı kerýenin keleshek urpaqqa jetkizýge qomaqty úles qosqanyna toqtalyp ótti.

Kúı merekesine aınalǵan kontsertke arnaıy kelgen shákirtteri kezek-kezek sahnaǵa kóterildi. Atap aıtqanda, Jeksenbek Nurjaýov, Sálim Іztileýov, Batyrjan Myqtybaev, Rýslan Baımýrzın, Talǵat Orazaev, Murat Ábýǵazy, Talap Hamzın, Baqytbek Qaıralapov jáne basqa dombyrashylar Qurmanǵazy, Táttimbet, Qazanǵap, Álikeı, Dáýletkereı, Dına, Súgir, Toqa, Esjan, Muqsıyn t.b. kompozıtorlardyń týyndylaryn oryndady. Sondaı-aq Bolathan Táshimov, Marat Núkeev, Danııar Baıjumanov, Asylbek Kenegesov, Nurbek Tapalov, Merýert ıÝsbekova, Dınara Nurbaeva, Nurken Áshirovter kúı shertti.

Búginde ustazdyq qyzmette júrgen qyzy ári shákirti Aıtolqyn Toqtaǵan da kúı tartyp, kórermenderdiń qoshemetine bólendi.

Dombyrashylardan quralǵan «Qyzdar toby» men «Serper» ansambli kúı tartqanda, kórermender bir jelpinip qaldy.

Kontsert Qurmanǵazynyń «Saryarqa» kúıimen aıaqtaldy.

A.Toqtaǵan osy mádenı sharaǵa atsalysqan barsha azamatqa alǵysyn bildirdi. «Shákirtterim elimizdiń ár óńirinen keldi. Óner jolynda qol jetkizgen ataq-abyroılary barshylyq. Bári de ómirden óz oryndaryn tapty. Búgingideı kúrdeli kezeńde osy kontsertke qaýyrt jumystaryn tastap, kelip tur. Qudiretti kúıdiń mártebesin arttyrdy. Ustazdyq qyzmettiń bir ǵanıbeti – shákirtterdiń syılaıtyny! Men kóp jyl oqytýshy boldym. Bir biletinim, men ár shákirtime adalmyn!», – dep tolqı sóıledi.

Aıta ketý kerek, Aıtjan Esenuly Toqtaǵan 1946 jyly 5 qarashada Batys Qazaqstan oblysynyń Jánibek aýdanynda dúnıege keldi. Qurmanǵazy atyndaǵy Almaty memlekettik konservatorııasynyń túlegi. Elý jylǵa jýyq ustazdyq qyzmet atqaryp keledi. Kúı tarıhyn tereń zertteýshi, birneshe ǵylymı eńbekter men kitaptardyń avtory. Sońǵy jyldary uly kúıshilerimiz Qurmanǵazy, Dáýletkereı, Dına, Seıtek týraly kóp tomdyq eńbekterin jaryqqa shyǵardy.


Jańalyqtar

MURAǴAT