Elordada «Qazaqstan Barysy» týrnıriniń fınaly ótedi
2022 jylǵy 27 maýsym 07:31

Elordada «Qazaqstan Barysy» týrnıriniń fınaly ótedi

NUR-SULTAN. QazAqparat - Astana kúnine oraılastyrylǵan qazaq kúresinen «Qazaqstan Barysy» HІ respýblıkalyq týrnıri 3 shilde kúni «Barys-Arena» muz saraıynda ótedi, dep habarlaıdy QazAqparat Qazaqstan Barysynyń Feısbýktegi paraqshasyna silteme jasap.

Dástúrli týrnır elimizde ulttyq sportty damytý arqyly salaýatty ómir saltyn nasıhattaý, Memlekettik rámizderdiń 30 jyldyǵyn atap ótý, qala kúnin merekeleý jáne balalar jyly aıasynda jastardy ulttyq sportpen shuǵyldanýǵa tartý, olardyń boıynda otansúıgishtik sezimdi qalyptastyrý maqsattaryn júzege asyrady.

Jarys erejesine sáıkes sáýir-mamyr aılarynda aýyl, aýdan, oblystyq (qalalyq) deńgeıdegi jáne kúshtik qurylymdar jelisi arasynda irikteý jarystary tolyǵymen ótip, oǵan elimiz boıynsha bes myńǵa jýyq sportshy qatysty. Sonyń ishinen 36 balýan aqtyq synǵa joldama aldy. Olardyń ishinde osyǵan deıin jeńis tuǵyrynan kóringen Muhıt Tursynov, Elaman Erǵalıev, Erasyl Qajybaev, Ǵalymjan Qyryqbaevtar bar.

2021 jyldyń jeńimpazy Dáýren Nuralınov jaraqatyna baılanysty týrnıge qatyspaıtynyn málimdedi. Sondaı-aq, eki dúrkin «Qazaqstan Barysy» atanǵan Aıbek Nuǵymarov sporttyq jolyn aıaqtaǵanyn resmı túrde jarııalady.

Týrnırdi QR mádenıet jáne sport mınıstriligi jáne Nur-Sultan qalasy ákimdiginiń qoldaýymen «Qazaqstan Barysy» qory men Qazaq kuresi Assotsıatsııasy uıymdastyrady.

Qazaq kúresi erejesine engizilgen ózgertýlerge baılanysty bıylǵy týrnır «búk» upaıynsyz ótedi.

«Qazaqstan Barysy» týrnıriniń júlde qory ádettegideı, jeńimpaz balýanǵa 25 000 000 teńge jáne altyn belbeý men aýyspaly altyn «taıtuıaq» tabystalady. Ekinshi orynǵa 5 500 000 teńge jáne úshinshi orynǵa 1 800 000 teńge, sáıkesinshe kúmis jáne qola belbeýlermen marapattalady.

Jankúıerler týrnırdi Qazsport arnalary arqyly tikeleı efırden kóre alady. Bıletter zakazbiletov.kz saıtynda satylymda. Resmı salmaq ólsheý rásimi 1 shilde saǵat 19.00- de «Han Shatyr» SOSO belgilenip otyr.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT