Elordada karantın sharalary jeńildedi
2022 jylǵy 16 tamyz 21:45

Elordada karantın sharalary jeńildedi

NUR-SULTAN. QazAqparat – Nur-Sultan qalasy bas sanıtar dárigeriniń №8 qaýlysynyń kúshi joıylatyn boldy, dep habarlaıdy QazAqparat tilshisi.

Atalǵan qaýly el astanasy epıdemııaologııalyq ahýaldy baǵalaý matrıtsasynyń «sary» aımaǵyna ótýine baılanysty qabyldanǵan bolatyn. Qujat boıynsha, qala turǵyndary men qonaqtaryna qoǵamdyq oryndar men jabyq ǵımarattardamaska kıip júrý, 10-nan artyq adam jınalatyn sharalardy onlaın rejımde ótkizý, vaktsınaǵa qarsy medıtsınalyq kórsetilim bar adamdardy qashyqtan jumys isteýge jiberý usynylǵan.

«Nur-Sultan qalasynda shekteý sharalaryn engizý týraly Nur-Sultan qalasynyń Bas memlekettik sanıtarlyq dárigeriniń 2022 jylǵy 21 shildedegi № 8 qaýlysy kúshi joıyldy dep tanylsyn», -dep jazylǵan qujat mátininde.

Degenmen, mamandar maska rejımin áli de saqtaýdy usynyp otyr.

«Nur-Sultan qalasynyń ákimdigine, qalalyq kásipkerler palatasyna, memlekettik organdarǵa, quqyq qorǵaý jáne arnaıy organdarǵa, menshik nysanyna qaramastan jeke jáne zańdy tulǵalarǵa adamdar kóp jınalatyn oryndarǵa (avtovokzaldar, saýda-oıyn-saýyq ortalyqtary, saýda úıleri, jabyq bazarlar, kontsert zaldary, teatrlar, kınoteatrlar, halyqqa qyzmet kórsetý ortalyqtary (HQKO), bankter, stadıondar jáne basqa da sporttyq qurylymdary jáne t. b.), uıymdasqan ujymdarǵa barǵan kezde, sondaı-aq qalalyq qoǵamdyq kólikte jol júrgen kezde betperde kııý usynylsyn», -dep jazylǵan qaýly mátininde.

Bul usynystyń 5 jasqa deıingi balalarǵa ǵana qatysy joq ekeni de aıtylǵan.

Qaýly qol qoıylǵan kúnnen bastap kúshine enedi. Onyń mátinin myna jerden kórýge bolady.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT