Elordada Farıza Ońǵarsynova kóshesi ashyldy

NUR-SULTAN. QazAqparat – Elordada Farıza Ońǵarsynova atyndaǵy jańa kóshe ashyldy, dep habarlaıdy QazAqparat tilshisi.

Uqsas jańalyqtar

Almaty stýdentteri Farıza Ońǵarsynovanyń jyrlaryn oqýdan jarysty

Máskeýde «Farıza» qoıylymynyń tusaýy kesildi

Aqyn esimi EKSPO-2017 mańynda «Vena oramy» turǵyn úı kesheni janyndaǵy jańa kóshege berildi. Saltanatty ashylýǵa qoǵam qaıratkerleri, depýtattar jáne aqynnyń oqyrmandary jınaldy.

«Qazaqtyń uly aqyny, dara qyzy Farıza apamyzdyń kóshesine kelgenderińiz úshin rahmet. Ótkendi umytpaı, eske alyp, jańa kóshelerdiń birine Farıza apamyzdyń esimin berip otyrmyz. Apamyz Parlament qabyrǵasynda da halyqtyń muńyn joqtap, kóp eńbek sińirdi. Sondyqtan, qazaqtyń osyndaı uly qyzynyń esimin kóshege berý kelesi urpaqqa da tárbıelik mańyzyn beredi dep oılaımyn. Apamyzdyń aty máńgi óshpesin. Búgin túste Farızanyń rýhyna as beremiz, qazir zıratyna baryp quran baǵyshtaımyz. Osy kóshe apamyzdyń esimimen dańǵyl jolǵa aınalsyn», - dedi Nur-Sultan qalasy ákiminiń orynbasary Baqtııar Máken saltanatty ashylý rásiminde.

Sonymen birge, ashylýǵa kelgen jazýshy jáne qoǵam qaıratkeri Aldan Smaıyl Farıza Ońǵarsynova týraly estelikterimen bólisti.

«Aqynyn syılaǵan elge árýaq ta, Alla da rıza bolady. Farıza keń adam edi, minezi qattylaý bolǵanymen, jan-jaǵyna jaqsylyq jasap júretin shalqar jan edi. Myna kósheniń de ózindeı keńdigin kórip, qýanyp otyrmyz. Farıza aqıqattyń aqyny boldy, shyndyqty aıtyp ótti. Shyndyqty aıtýdyń ózi – erlik. Eldiń shyndyǵyn, eldiń muńyn óle-ólgenshe kúıttep ketti. Al qazir Farızaǵa degen halyqtyń sheksiz mahabbatyn kórip júrmiz. Farıza qazaqtyń qyzy bola otyryp, uly da bola bilgen adam. Qazaq óziniń ıgi jaqsylaryna eshkimdi teńgermeıdi. Biraq, Farızany Mahambetke teńedi. Men dál sondaı ulylarǵa teńegen basqa qaıratkerlerdi bilmeımin. Farıza óz zamanynda Mahambettiń ornyn joqtatpaǵan, sony toltyrýǵa tyrysqan uly tulǵalardyń biri boldy», - dedi Aldan Smaıyl.

Jańa kósheni aqynnyń uly Almas Ońǵarsynov pen Nur-Sultan qalasy ákiminiń orynbasary Baqtııar Máken saltanatty túrde ashty.

Aıta keteıik, búgin 16.00-de QR Ulttyq akademııalyq kitaphanasynda Farıza Ońǵarsynovanyń «Shilde» jáne «Poldnevnyı Jar» kitaptarynyń tusaýkeseri ótedi.

Keshki 19:00-de Jastar teatry sahnasynda «Farıza» spektakli qoıylady.