+7 (701) 759 90 19
USD 421.58 EUR 496.83
RUB 5.53 CNY 62.2
Jańalyqtar

Elordada «Daryn» jastar memlekettik syılyǵynyń laýreattary marapattaldy

2019 jylǵy 9 jeltoqsan 18:07
Bólisińiz:
Elordada «Daryn» jastar memlekettik syılyǵynyń laýreattary marapattaldy

NUR-SULTAN. QazAqparat - Elordada Qazaqstan Respýblıkasy Úkimetiniń «Daryn» Memlekettik jastar syılyǵynyń laýreattaryn saltanatty marapattaý rásimi ótti, dep habarlaıdy QazAqparat.

«Daryn» memlekettik jastar syılyǵy jemisti ǵylymı, shyǵarmashylyq, qoǵamdyq jumystaryna, sondaı-aq joǵary sporttyq jetistikterine daryndy jastardy memlekettik qoldaý maqsatynda jyl saıyn taǵaıyndalady.

Laýreattarǵa marapattardy Qazaqstan Respýblıkasy Premer-mınıstriniń orynbasary Berdibek Saparbaev, Aqparat jáne qoǵamdyq damý mınıstri Dáýren Abaev, Bilim jáne ǵylym mınıstri Ashat Aımaǵambetov, Eńbek jáne halyqty áleýmettik qorǵaý mınıstri Birjan Nurymbetov, Qazaqstan Respýblıkasy Parlamenti Májilisiniń depýtattary Nurlan Álimjanov pen Olga Shıshıgına jáne basqa da kórnekti mádenıet, jýrnalıstıka jáne óner qaıratkerleri tabystady.

«Memlekettiń bolashaǵy, úmiti – jastar. 28 jyl ishinde Qazaqstandaǵy jastarǵa qandaı jaqsylyq, jaǵdaı jasalǵanyn kúndelikti ómirden, baspasózden jaqsy bilesizder. Elimizdiń Tuńǵysh prezıdenti Nursultan Ábishuly bıylǵy jyldy «Jastar jyly» dep ataýy bekerden beker emes. Bıyldyń ózinde 2 mln-ǵa jýyq jas memlekettiń qoldaýyna ıe bolyp otyr. Jol kartasy boıynsha 500 mlrd teńge jastarǵa shákirtaqy, grant, jataqhana, nesıe berýge arnaldy. Memleket basshysy Qasym-Jomart Kemeluly osy Jastar jylyn ary qaraı jalǵastyrý úshin kelesi jyldy «Eriktiler jyly» dep atady», - dedi QR Premer-Mınıstriniń orynbasary Berdibek Saparbaev «Áleýmettik qyzmet» nomınatsııasyndaǵy jeńimpazdardy quttyqtaý barysynda.

«Daryn» syılyǵy 10 nomınatsııa boıynsha beriledi.

«Qoǵamdyq qyzmet» nomınatsııasy boıynsha «Qazaqstan Respýblıkasynyń etnosport assotsıatsııasynyń» bas hatshysy Nursultan Ibragımov, «Qazaqstan stýdentter Alıansy» Respýblıkalyq stýdentter qozǵalysy» QB prezıdenti Іlııas Tústikbaev jeńimpaz atandy.

«Jýrnalıstıka» nomınatsııasy boıynsha marapatty birqatar derekti dokýmentaldy fılmderdiń avtory Myrzabek Túsipov, jýrnalıster arasyndaǵy respýblıkalyq baıqaýlardyń júldegeri Aıbek Tasqalıev aldy.

«Ǵylym» nomınatsııasy boıynsha ǵalym fızıkter-ónertapqyshtar Nurlan Qanat jáne Erasyl Erlanuly marapattaldy.

«Teatr jáne kıno» nomınatsııasy boıynsha M. Áýezov atyndaǵy Memlekettik akademııalyq drama teatry akteri Ótepbergen Aıan, Q. Qýanyshbaev qazaq mýzykalyq-drama teatrynyń aktrısasy Altyngúl Erbolqyzy marapattaldy.

«Sport» nomınatsııasy boıynsha Tórt qurlyq chempıonatynyń kúmis júldegeri, mánerlep syrǵanaýdan 2019-qysqy Ýnıversıadanyń kúmis júldegeri Elızabet Tursynbaeva, Álem chempıonatynyń eki dúrkin kúmis júldegeri (2017, 2019), Azııa chempıonatynyń eki dúrkin kúmis júldegeri (2017, 2019), Qazaqstan Respýblıkasy quramasynyń kapıtany Qamshybek Qońqabaev marapattaldy.

«Klassıkalyq mýzyka» nomınatsııasy boıynsha túrli mýzykalyq baıqaýlardyń birneshe márte laýreattary, kompozıtorlar Danara Musahan jáne Ázimbek Qaldybekuly Jambaev marapattaldy.

«Halyq shyǵarmashylyǵy» nomınatsııasy boıynsha aıtysker Sultanhan Meıirbek, Ǵ.Qurmanǵalıev atyndaǵy oblystyq fılarmonııasy» memlekettik kommýnaldyq qazynalyq kásipornynyń ártisi, dırıjeri Jaras Satybaldıev marapattaldy.

«Ádebıet» nomınatsııasy boıynsha óleńderi túrik, ázirbaıjan, ıspan jáne basqa tilderge aýdarylǵan aqyn – Jadyra Baıbulanova, poezııa konkýrstarynyń jeńimpazy, birqatar kitaptardy qazaq tiline aýdarýshy avtor Bekzat Smaǵulov marapattaldy.

«Dızaın jáne beıneleý óneri» nomınatsııasy boıynsha bas dızaıner, «JÚZBAI DIZAIN» dırektory, Qazaq sán qaýymdastyǵyny prezıdenti Aıjan Júzbaı, músinshi skýlptor Músirep Syrym marapattaldy.

«Estrada» nomınatsııasy boıynsha «Slavıan bazar – 2019» halyqaralyq festıvaliniń Gran-prı ıegeri Ádilhan Makın, «Qazaqkontsert» memlekettik kontserttik uıymynyń solısti, konferanse Marat Tórehanuly Áıtimbaı marapattaldy.

Syılyqqa 29 jasqa deıingi Qazaqstan Respýblıkasynyń azamattary halyqaralyq jáne respýblıkalyq baıqaýlardyń, festıvaldar men kórmelerdiń laýreattary, respýblıkalyq jáne halyqaralyq deńgeıdegi sporttyq jarystardyń jeńimpazdary men júldegerleri, sonymen qatar qyzmeti ınnovatsııaly, tıisti salanyń jáne tutas qoǵamnyń damýyna yqpal etetin azamattar úmitker bola alady.

2017 jyldan bastap Qoǵamdyq damý mınıstrliktiń bastamasymen syılyq jyl saıyn beriledi. 2018 jyly syılyq kólemin úsh esege ulǵaıtý máselesi sheshilip, ár nomınatsııa boıynsha syılyq kólemi 600 myń teńge boldy.

Aıta keteıik, úmitkerlerdiń ótinimderi 2019 jylǵy 16 mamyrdan 10 tamyzǵa deıin qabyldandy. Ótinimderdi konkýrstyq komıssııa qarady. Komıssııa quramyna belgili mádenıet jáne óner qaıratkerleri, ǵalymdar, jazýshylar, parlament depýtattary men qoǵam qaıratkerleri kirgen.

Bizdiń kanalymyzǵa jazylyńyz:

Bólisińiz:

Avtor:

Zarına Qaharman

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Aıdar Ospanalıev
Aıdar Ospanalıev
954-059
REDAKTOR
Jarylqasyn Saıagúl
Jarylqasyn Saıagúl
954-059
REDAKTOR
Janat Qapalbaeva
Janat Qapalbaeva
954-059

MURAǴAT