Elordada bir kúnde 177 adam tótenshe jaǵdaı rejımin buzdy
2022 jylǵy 17 qańtar 12:01

Elordada bir kúnde 177 adam tótenshe jaǵdaı rejımin buzdy

NUR-SULTAN. QazAqparat – Elordada bir kúnde 177 adam tótenshe jaǵdaı rejımin buzdy. Bul týraly Nur-Sultan qalasy komendatýrasynyń baspasóz qyzmetinen málim etti, dep habarlaıdy QazAqparat tilshisi.

«Elordadaǵy jaǵdaı turaqty. Túngi saǵat 23.00-den bastap tańǵy 07.00-ge deıin komendanttyq saǵat jalǵasýda. Qala perımetri boıynsha 6 blokbeket táýlik boıy jumys isteýde. Bir táýliktiń ishinde qalada 9 qylmys tirkeldi. 74 jol-kólik oqıǵasy oryn alyp, eki adam jaraqat aldy. 102 arnasyna 1 732 astam qońyraý túsken. Olardyń kóbi - anyqtamalyq sıpattaǵy habarlamalar. Qala turǵyndaryn aýa-raıyna baılanysty tas joldyń jaǵdaıy, blokbeketterdiń jumysy, sondaı-aq, quqyq buzýshylyq týraly máseleler qyzyqtyrýda», - dep atap ótedi komendatýradan.

Vedomstvo málimetinshe, elordada bir kúnde 177 adam tótenshe jaǵdaı rejımin buzdy. Olarǵa qatysty QR ÁQBtK-niń 476-baby boıynsha ákimshilik is qozǵaldy. Protsessýaldyq sheshimdi sot qabyldaıdy.

Sonymen qatar táýlik ishinde komendanttyq saǵat rejımin buzǵany úshin 8 kásipkerlik sýbektisiniń jumysyna tosqaýyl qoıyldy. Esil aýdanynda 2 kóńil kóterý orny tarapynan komendanttyq saǵatty buzý faktisi anyqtaldy. «Maestro» karaoke klýby men «KINGDOM» restobary komendant saǵatyn elemeı, azamattardy qabyldaǵan. Sonymen qatar, Kenesary kóshesindegi «Dyshı» barynda da 35 adam bolǵan.

«Barlyq tártip buzýshylar polıtsııaǵa jetkizilip, olarǵa qatysty ákimshilik is qozǵaldy. Mekemelerdiń lıtsenzııasyn keri qaıtarý máselesi qaralýda. Qoldanystaǵy zańnamaǵa sáıkes tótenshe jaǵdaı rejıminiń talaptaryn buzǵany úshin jaýapkershilik kúsheıtildi. Elordanyń komendatýrasy komendanttyq saǵatty buzbaýdy, azamattardyń tártibi men tynyshtyǵyn saqtaýdy eskertedi. Barlyq jasalyp jatqan is-sharalar sizderdiń qaýipsizdikterińizdi qamtamasyz etý jáne qoǵamdyq tártipti saqtaý úshin jasalyp otyr», - delingen taratylǵan aqparatta.


Jańalyqtar

MURAǴAT