Elorda áýejaıyn qardan tazartý kúsheıtilgen rejımde júrgizilip jatyr
2021 jylǵy 25 qarasha 15:02

Elorda áýejaıyn qardan tazartý kúsheıtilgen rejımde júrgizilip jatyr

NUR-SULTAN. QazAqparat – Elorda áýejaıyndaǵy ushaq jóneltý alańdaryn qardan tazartý úshin 21 tehnıka, men 35 adam kúsheıtilgen rejımde jumys istep jatyr, dep habarlaıdy QazAqparat tilshisi.

Bul týraly Nazarbaev halyqaralyq áýejaıy basqarma tóraǵasynyń óndiris jónindegi orynbasary Erǵazy Joldasov málim etti.

«Qazir qaıta aýa raıy sál tynyshtaldy. Túnde kórinis durys bolmaǵnadyqtan, tazalaý jumystary júrgizý qıyn boldy. Ushý-qoný jolaqtaryn tazalaýǵa 21 tehnıka, 35 adam kúsheıtilgen rejımde jumys istep jatyr. Jolaqqa qatqan muzdy arshý úshin arnaıy reagent qoldanyp jatyrmyz. Erı jaýǵan qardyń áserinen muz qatqan bolatyn. Sondyqtan jolaqty qardan tazartqan soń, astyndaǵy muzdy arshımyz. Aýa raıyna baılanysty ushaqtardy qabyldap, jóneltý de qıynǵa soǵyp tur. Keıbir ushaqtarda júksalǵyshtary ashylmaı qalyp jatyr. Erı jaýǵan qar qatyp qalyp jatyr», - dep túsindirdi Erǵazy Joldasov.

Jýrnalıster áýejaı ókilinen Memleket basshysy Qasym-Jomart Toqaevtyń Belgııa Koroldigine josparlanǵan sapary týraly da surady.

«Joq. Ol reıs ýaqytynda oryndaldy. Ol tańǵy 10.00-de ushyp shyqty. Túni boıy júrgizilgen jumystyń arqasynda áýejaı tańǵy saǵat 09.00-de ashyldy. Prezıdent kedergisiz ushyp ketti», - dedi áýejaı ókili.


Sondaı-aq... oqyńyz
Seriktester jańalyqtary

Jańalyqtar

Úrdis

MURAǴAT