Elimizdiń otyn-energetıka salasyn damytý úshin qandaı jobalar júzege asty
2021 jylǵy 31 jeltoqsan 13:00

Elimizdiń otyn-energetıka salasyn damytý úshin qandaı jobalar júzege asty

NUR-SULTAN. QazAqparat – 2021 jyldyń qorytyndysynda elimizde 185 myń tonna mólsherinde munaı-gaz-hımııa ónimi óndiriledi. Bul jaıynda QR Energetıka mınıstrliginen málim etti, dep habarlaıdy QazAqparat tilshisi.

Munaı-gaz-hımııa óndirisin damytý

Qazirgi ýaqytta respýblıkada hosh ıisti kómirsýtekter óndirisi, polıpropılen jáne benzınge arnalǵan oktandy kóteretin qospalar shyǵaratyn zaýyt, sondaı-aq maılaý maılaryn shyǵaratyn zaýyttar jumys isteıdi.

Otyn energetıka keshenin damytý tujyrymdamasynyń josparlaryna sáıkes 2030 jylǵa qaraı munaı-gaz-hımııa ónimderin óndirý kólemi 18 ese artyp, 3,4 mln tonnaǵa deıin jetedi.

Búgingi tańda Shymkent qalasynda qýaty 57 myń tonna metıl-tret-býtıl efıri zaýyty iske qosyldy.

2022 jyly Atyraý oblysynda qýaty jylyna 500 myń tonna polıpropılen óndiretin zaýytty paıdalanýǵa berý josparlanǵan.

Sonymen qatar munaı-gaz-hımııa salasynda birqatar iri joba, atap aıtqanda, qýaty jylyna 1,25 mln tonna polıetılen jáne qýaty jylyna 189 myń tonna býtadıen óndirý boıynsha jobalar iske asyrylatyn bolady.

Polıetılen jobasy boıynsha búgingi tańda strategııalyq ınvestormen yntymaqtastyqtyń bazalyq sharttary jónindegi kelisimderge qol qoıyldy.

Býtadıen jobasy boıynsha osy jyldyń mamyr aıynda strategııalyq áriptes retinde «Tatneft» jarııa aktsıonerlik qoǵamymen jobany birlesip iske asyrý týraly kelisim rásimdeldi.

Jobanyń tehnıkalyq-ekonomıkalyq negizdemesin ázirleý júrgizilip jatyr.

Bul jobalardy iske asyrý Qazaqstan ekonomıkasyna shamamen 8,6 mlrd AQSh dollary kóleminde ınvestıtsııa tartýǵa múmkindik beredi.

Іshki naryqty munaı ónimderimen qamtý

Osy jyldyń tamyzynan qazan aıyna deıin elimizdiń janar-jaǵarmaı materıaldary naryǵynda dızel otyny tapshylyǵynyń paıda boldy.

Osyǵan baılanysty Energetıka mınıstrligi ishki naryqty dızel otynymen qamtamasyz etý úshin naqty is-sharalar qabyldady.

Atap aıtqanda, 2022 jylǵy 21 mamyrǵa deıin avtomobıl kóligimen munaı ónimderin áketýge tyıym salyndy.

Atyraý munaı óndeý zaýytyndaǵy josparly jóndeý 2022 jylǵa aýystyryldy.

Pavlodar munaı-hımııa zaýytyndaǵy jóndeý jumystary osy jyldyń qyrkúıek aıynan qarasha aıyna jyljytyldy.

Reseı Federatsııasynyń munaı óńdeý zaýyttarynan 281 myń tonna kóleminde dızel otyny ımporttaldy.

Osydan keıin aldaǵy ýaqytta janar-jaǵarmaı materıaldarynyń tapshylyǵyn boldyrmaý maqsatynda birqatar is-shara ázirlendi.

Birinshiden, munaı óńdeý zaýyttarynyń keńeıtilgen jóndeý jumystary aralyq kezeńge kóshiriledi. Jóndeý merzimderi qysqartylady.

Ekinshiden, 200 myń tonna kóleminde munaı ónimderiniń rezervtik qorlary qurylady.

Úshinshiden, munaı óńdeý zaýyttaryndaǵy jóndeý jumystarynyń jáne aýyl sharýashylyǵy taýarlaryn óndirýshiler úshin dızel otynyn tıep-jóneltý merzimderin úılestirý, oǵan sáıkes aýyl sharýashylyǵy taýarlaryn óndirýshiler úshin dızel otynyn jóneltý aqpan aıynda, burynǵy merzimderden bir aı buryn bastalatyn bolady.

Tórtinshiden, munaı bazalary esepke alatyn baqylaý aspaptarymen jaraqtandyrylady.

Jalpy, 2021 jyldyń qorytyndysy boıynsha munaı óndirý kólemi – 85,7 mln tonna, munaı eksporty – 67,6 mln tonna, munaıdy qaıta óńdeý kólemi - 17,1 mln tonna jáne munaı ónimderin óndirý kólemi 13,1 mln tonna boldy.

Sonymen qatar aldaǵy onjyldyqtyń perspektıvalyq jobalarynyń biri «Qalamqas-teńiz» jáne «Hazar» jobalary iske asyrylady.

Quny 4,5 mlrd AQSh dollary bolatyn bul ken oryndardy ıgerý 2028 jyldan bastap qosymsha 4 mln tonna munaı óndirýge múmkindik beredi.

Bıyl gaz óndirý kólemi 54 mlrd tekshe metr deńgeıinde kútililedi. Onyń ishinde taýarlyq gaz óndirisi - 29,4 mlrd, gaz eksportynyń kólemi – 7,7 mlrd, al suıytylǵan gaz óndirisi 3,1 mln tekshe metr mólsherinde boljanyp otyr.

Aldaǵy ýaqytta Qarashyǵanaq, Qashaǵan jáne Teńiz nysandarynda jobalardy iske asyrý, sondaı-aq jańa perspektıvaly ken oryndaryn ýaqtyly paıdalanýǵa berý shıki gaz óndirýdi 2030 jylǵa qaraı 87,1 mlrd tekshe metrge deıin ulǵaıtýǵa múmkindik beredi.

Elektr energııasy tapshylyǵyn joıý

Energetıka mınıstrliginiń aqparatyna sáıkes, 2021 jyldyń qorytyndysynda elektr energııasyn óndirý 113,7 mlrd kVt/saǵat deńgeıinde kútilledi.

Jalpy bıyl 2020 jylmen salystyrǵanda tutynýdyń ósýi shamamen 6 paıyzdy quraıdy.

Degenmen, elimizde Reseı Federatsııasynyń energııa kózderi esebinen óteletin 250 mln kVt/saǵ kóleminde elektr energııasynyń tapshylyǵy baıqalady.

Sondyqtan ekonomıkanyń elektr energııasyna degen qajettiligin jabý maqsatynda jumys istep turǵan elektr stantsııalaryn jańǵyrtý jáne jańa elektr stantsııalaryn salý josparlanýda.

Munan bólek jańartylatyn energııa kózderin iske qosý aıasynda 11 GVt óndirýshi qýattardy iske qosý jáne 2030 jylǵa qaraı elektr energııasyn óndirýdi 141,2 mlrd kVt/saǵatqa deıin ulǵaıtý josparlanyp otyr.

Energetıka mınıstrligi elektr energetıkasy salasyn damytýdyń 3 jobasyn iske asyrmaq.

Birinshi, Aqtóbe jylý elektr ortalyǵynda quny 21,7 mlrd teńge bolatyn kádege jaratýshy qazandyǵy bar gaz týrbınaly qondyrǵysy salynady.

Onyń elektr qýaty 57 MVt bolady. Ekinshiden, Ekibastuz GRES-1-diń elektr qýaty 500 MVt bolatyn № 1 energııa blogyn qalpyna keltirý júrgiziledi. Jobanyń quny – 110,5 mlrd teńge.

Úshinshi, qýaty 636 MVt, quny 450 mlrd teńge bolatyn №3 energııa blogyn ornata otyryp, Ekibastuz GRES-2-ni keńeıtý jáne rekonstrýktsııalaý júrgiziledi.

Osy jobalardy iske asyrý nátıjesinde 2025 jylǵa qaraı jıyntyq belgilengen qýaty 1 100 MVt-tan asatyn qosymsha qýattardy iske qosý qamtamasyz etiledi.

Munan bólek, GRES-2-niń 4 jáne 5-bloktaryn salý máselesi qarastyrylyp jatyr.

Memleket basshysynyń tapsyrmasyna sáıkes Birtutas energııa júıesiniń Ońtústik aımaǵynda 2026 jylǵa deıin jalpy jıyntyq qýaty 3 050 MVt bolatyn jańa manevrlik generatsııany engizý boıynsha 7 jobany iske asyrý josparlanǵan.

Bul jobalardyń jalpy quny – 1,5 trln teńge.


Jańalyqtar

MURAǴAT