Elimizdegi dári-dármekke biryńǵaı baǵa belgilenbek

2022 jylǵy 6 qazan, 14:31
Elimizdegi dári-dármekke biryńǵaı baǵa belgilenbek

ALMATY. QazAqparat - Qazaqstan is júzinde básekelestikti keńeıtýge múmkindik beretin monopolııaǵa qarsy saıasattyń jańa baǵyttaryn belgiledi. Bul týraly Básekelestikti qorǵaý jáne damytý agenttiginiń tóraǵasy Marat Omarov VIIІ Eýrazııalyq monopolııaǵa qarsy forým barysynda aıtty, dep habarlaıdy QazAqparat tilshisi.

Atalǵan forým barysynda Marat Omarov agenttik jumysynyń úsh strategııalyq baǵytyna toqtaldy.

«Búgingi forým bizdiń elderimizdiń monopolııaǵa qarsy organdary arasynda tájirıbe men bilim almasý úshin mańyzdy saraptamalyq alań. Qazaqstan is júzinde básekelestikti keńeıtýge múmkindik beretin monopolııaǵa qarsy saıasattyń jańa baǵyttaryn belgiledi. Biz úsh baǵytty belgiledik: jekeshelendirýdiń jańa tetikteri, memlekettik qoldaý sharalaryna teń qoljetimdilik, sondaı-aq básekelestikti damytý», - dedi Marat Omarov.

Ol jaqyn arada jekeshelendirý tetigi qaıta qaralatynyn, atap aıtqanda, jekeshelendirýge jatatyn nysandardy irikteýdiń negizgi kórsetkishteri belgilenetinin jetkizdi.

«Kásipkerlerdi memlekettik qoldaý sharalaryn arttyrýǵa keletin bolsaq, BQDA memlekettik qoldaý sharalaryna teń qoljetimdilik prıntsıpin ustanady. Ol úshin memlekettik qoldaý sharalaryn alýshylardyń túpkilikti benefıtsıarlaryna taldaý jasalady. Sonymen qatar, memlekettik satyp alýlar men kvazısektordyń satyp alýlary shaǵyn jáne orta bıznesti qoldaýǵa basa nazar aýdara otyryp, bıznesti qoldaýdyń qosymsha quraly retinde qarastyrylatyn bolady»,- dedi ol. Spıkerdiń sózinshe, bul jerde básekelestik ortaǵa birlesken áser etýdiń negizgi tetikterin, kórsetkishterdi anyqtaý qajet. «Kórsetkishterge keletin bolsaq, EYDU elderinde retteý arqyly jasalǵan retteýshi kedergiler PMR (Product Market Regulation) kórsetkishterimen ólshenedi. Biz olardy Agenttiktiń tıimdilikti baǵalaý júıesine engizýdi josparlap otyrmyz», - dedi Marat Omarov.

Sondaı-aq Agenttiktiń aldynda jańa mindetter tur.

«Agenttik naryqtardyń tıimdiligin arttyrýdy, erkin básekelestik úshin qolaıly ınstıtýtsıonaldyq jáne uıymdastyrýshylyq jaǵdaılardy jasaýdy, baǵany memlekettik retteýden naryqtyq baǵa belgileýge basa nazar aýdarýdy josparlap otyr. Biz dári-dármek baǵasyn kezeń-kezeńimen retteýdi usynyp otyrmyz. Qazir naryq qatań retteledi, tirkelgen dárilerdiń tolyq tizimi boıynsha baǵa belgilendi. Birinshi kezeńde dári-dármektiń 220 saýdalyq ataýyn, onyń ishinde retseptsiz satylatyn preparattardy retteýden shyǵarý josparlanýda»,- dedi spıker.

Aıta keteıik, Almatyda VIII Eýrazııalyq monopolııaǵa qarsy forým ótip jatyr. Oǵan Qazaqstan, Reseı, Ázerbaıjan, Ózbekstan sarapshylary qatysyp jatyr.


Uqsas jańalyqtar
Seriktester jańalyqtary

Jańalyqtar