+7 (701) 759 90 19
USD 418.67 EUR 507.64
RUB 5.71 CNY 64.74
Jańalyqtar

Elimizdegi Covid-19 jaǵdaıyna sholý: PTR nátıjesi joq jolaýshy áýe bortyna jiberilmeıdi

2020 jylǵy 24 qazan 21:02
Bólisińiz:
Elimizdegi Covid-19 jaǵdaıyna sholý: PTR  nátıjesi joq jolaýshy áýe bortyna jiberilmeıdi

NUR-SULTAN. QazAqparat - Ótken táýlikte elimiz boıynsha 164 adamnan koronavırýs indeti PTR arqyly rastaldy. Al, 73 adam bul indetten emdelip shyqqan. Álemdi alańdatqan indettiń aldyn-alý úshin osy aptada qandaı is-sharalar qolǵa alyndy, vırýstyń ekinshi tolqyny taraı qalsa dári-dármegimiz jete me, sholyp kóreıik.

Elimizdegi epıdemıologııalyq ahýaldy nasharlatyp almaý úshin shekaralyq aımaqtardaǵy saqtyq sharalaryn kúsheıtýge basa mán berý kerek sııaqty. Ásirese, Reseımen shekaralas oblystarda alys-beris pen barys-kelistiń sońy el ishindegi vırýstyń keń taralyp ketýine ákep soǵýy múmkin. Ony dáleldeýdiń de qajeti joq. Mysaly, Soltústik Qazaqstan oblysynda keıingi eki aptada koronovırýs juqtyrǵandar sany 1 jarym ese artqan. Óńirde epıdemıologııalyq ahýal kúnnen kúnge qıyndap barady. Al vırýs juqtyrǵandardyń 37 protsenti – kórshi Reseıden kelgender. Oblys turǵyndarynyń 21 protsenti PTR testileýden ótken. Nátıjesi jaqsy emes. Qazir 6 aýdandaǵy 10 eldi meken karantınge jabylǵan. Endi demalys kúnderi saýda oryndary jabylyp, qoǵamdyq kólik qatynasy toqtatylady. Jalpy naýryz aıynan beri oblysta 25 adam qaýipti ınfektsııadan kóz jumǵan eken. Óńirde 60 jastan asqandardyń úıden shyǵýyna shekteý qoıyldy. Alaıda zeınetkerler ony eskermeı, Reseıge balalaryna qonaqqa baratyn kórinedi. Buǵan dereý tyıym salmasa bolmaıdy. Sebebi Reseıdiń Qorǵan, Omby, Túmen oblystarynda qaýipti vırýsty juqtyrǵandardyń sany kún saıyn ósip barady.

27 qazannan bastap Qazaqstannyń Bas sanıtar dárigeriniń qaýlysymen karantın talaptary kúsheıtiledi. Atap aıtqanda, áýe jáne qurlyqtaǵy shekara beketterine qatań sanıtarlyq talap qoıylady. Halyqaralyq reıstermen ushyp kelgen jolaýshylar jaramdylyq merzimi 3 kúnnen aspaǵan PTR testi kórsetýi tıis. Eger de jolaýshynyń qolynda koronavırýsty anyqtaıtyn test qorytyndysy bolmasa, áýe kemesiniń bortyna jiberilmeıdi. Sondaı-aq, tranzıttik tasymal jasaıtyn kólik júrgizýshileriniń qolynda PTR testtiń nátıjesi bolýy tıis. Jergilikti sanıtarlyq-epıdemıologııa qyzmetterine karantınge alynǵan azamattardyń synama qorytyndysyn eki kúnniń ishinde ázirleý tapsyryldy.

Osy aptada qabyldanǵan sheshimmen Balqash qalasynda qarantın rejımi kúsheıtildi. Búginnen bastap saıabaqtar, balalardyń oıyn alańdary jumysyn toqtatty. Buǵan qosa turǵyndarǵa keshki saǵat 22:00-den tańǵy saǵat 05:00-ge deıin jeke kóligimen júrýge tyıym salyndy. Tek jumysshy tasıtyn avtobýstar ǵana júredi. Dúkender men tamaqtaný oryndary keshki saǵat 22:00-ge deıin ǵana jumys isteıdi. Al qyzmet kórsetý oryndaryna aldyn ala jazylý qajet. Kámelet jasyna tolmaǵan jasóspirimderdiń úlkendersiz kóshede júrýine tyıym salyndy. Al 65 jastan asqandarǵa úıden shyqpaýǵa keńes berilip otyr. Shaharda osy kúnge deıin 40 adam vırýs juqtyrǵan.

Aımaqtarda karantınniń talaptary áli de saqtalmaı keledi. Qaterli indettiń ekinshi tolqyny kelýi múmkin degen qaýipke senbeı júrgender de kóp. Mysaly, Aqmola oblysynda monıtorıng júrgizilgen nysandardyń 50 paıyzynda karantındik talaptar saqtalmaǵan. Óńirdiń bas sanıtarlyq dárigeri Aınagúl Mýsınanyń aıtýynsha, saýda oryndaryna kire beriste kelýshilerdiń qyzýy tekserilmeıdi, sonymen birge sanıtaızerler de ár 150 metr saıyn, qoljetimdi jerde ornalaspaǵan. Maska rejımi tolyqqandy saqtalmaıdy, saýda úıleriniń ákimshiligi men satýshylary tarapynan kelýshilerge maska taǵý týraly eskertý aıtylmaıdy. Satýshylardyń ózderi maskasyz, bolǵannyń ózi durys taqpaıdy. Áleýmettik qashyqtyq ta saqtala bermeıdi. Býtıkterdiń kire berisinde bes adamnan kóp kirýge bolmaıdy dep eskertý jazba ilinip turǵanymen, is júzinde ol saqtalmaıdy. Oblys boıynsha koronavırýs ınfektsııasyn juqtyrǵandardyń basym kópshiligi Kókshetaý qalasynda tirkelip otyr.

«Bizde qazirgi tańda epıdemıologııalyq jaǵdaı nasharlap keledi. Onyń ishinde Kókshetaý qalasynda koronavırýs ınfektsııasyn juqtyrýdyń 97 jaǵdaıy tirkeldi. Bul búkil oblys boıynsha qazan aıynda tirkelgenderdiń 80 paıyzyn qurap otyr», - dedi Aınagúl Mýsına.

ІІM aqparatyna sáıkes, Shymkentte túngi ýaqytta jumys istep, karantın rejımin buzǵan karaoke anyqtaldy. Qazan aıynyń 20-nan 21-ne qaraǵan túni Shymkent qalasygnyń Polıtsııa departamenti Qarataý APB-nyń ýchaskelik polıtsııa ınspektorlary reıdtik is-sharalaryn júrgizý barysynda M.Dýlatı kóshesiniń boıynda ornalasqan Shelby karaoke klýbynyń saǵat 01:00-de jumys istep, karantın rejımin óreskel buzǵanyn anyqtaǵan. Atalǵan jaıt boıynsha nysan ıesine QR ÁQBK-niń 425-babymen ákimshilik is qujattar jınaqtalyp, sanıtarlyq-epıdemıologııalyq qyzmetke joldanyldy. Sonymen qatar, qorqor (kalıan) shekken úsh azamatqa jáne atalǵan nysan ákimshiligine QR ÁQBK-niń 441-babymen ákimshilik hattama toltyryldy.

Elimizdegi karantın talaptaryn kúsheıtý sharalary jalǵasa berer. «Jaman aıtpaı, jaqsy joq» deıtin halyqpyz. Eger koronovırýstyń ekinshi tolqyny bizdiń elde de kúsheıetin bolsa, kóktemdegideı dári tappaı qalmaımyz ba degen saýal kópshiliktiń kókeıinde júr.

Kúni keshe ǵana «SK-Farmatsııa» basshysy Erhat Isqalıev óńirlerde dári tapshylyǵy bolmaıdy dep málimdedi. El boıynsha 4 hab qurylyp, dárilik preparattar tasymaldanyp jatyr. Statsıonarlarda 1 aılyq qor bolsa, qoımalarda 2 aılyq qor jınalǵan. Bul dári-dármek aıyna 60 myń adamdy emdeýge jetedi. 8,2 mlrd teńgege 44 dárilik preparat túri satyp alynǵan. Aıtýynsha, batys aımaqtaǵy Aqtóbe habynda 4 mlrd teńgeniń dárisi bar. Onyń 400 mln teńgesine koronavırýsqa qarsy preparattar alynǵan. Sondyqtan alańdaýdyń qajeti joq dep otyr. Vırýsqa qarsy preparattyń 50 protsentke jýyǵy ózimizde óndirilip jatyr. Jalpy óndiris kólemi 39,8 protsentke ósken. Otandyq kásiporyndar táýligine 900 myń betperde shyǵarady. Qoımalarda 18 mln dana betperde men 7 mln qolǵap daıyn tur.


Bizdiń kanalymyzǵa jazylyńyz:

Bólisińiz:

Avtor:

Álimhan Qanatuly

Pikir qaldyrý
+7
Jiberý
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Erbol Janat
Erbol Janat
954-059
REDAKTOR
Janıbek Amangeldı
Janıbek Amangeldı
954-059

MURAǴAT