Elimizde veterınarlardyń jalaqysyn kóterýdiń birneshe joly qarastyrylyp jatyr
2022 jylǵy 23 qańtar 13:25

Elimizde veterınarlardyń jalaqysyn kóterýdiń birneshe joly qarastyrylyp jatyr

NUR-SULTAN. QazAqparat – Aýyl sharýashylyǵy mınıstrligi veterınarııa salasy júıesin reformalaýdy 2022-2026 jyldarǵa josparlanyp otyr. Salaǵa qatysty sheshimin tabýy tıis máseleniń biri maman daıarlaý jáne olardyń jalaqysy. Veterınarııa salasy júıesin reformalaý barysynda atalǵan másele qalaı sheshimin tappaq? Ol týraly QazAqparat tilshisine QR AShM veterınarııalyq baqylaý jáne qadaǵalaý komıtetiniń bas sarapshysy Altynbek Úrkinbaev aıtyp berdi.

«Kadr daıarlaýda bizdiń mınıstrlik joǵary oqý oryndarynda veterınarııa mamandyǵy boıynsha bilim berýdiń biryńǵaı baǵdarlamasyn engizýdi usynyp otyr. Veterınarııa mamandyǵy úshin aýyldyq kvotany 70%-ǵa deıin arttyrý da mańyzdy. Sonymen qatar oqýdy bitirgennen keıin 3 jyldyń ishinde tek sol oqý ornynyń bergen baǵyty boıynsha ǵana emes, túlekterge «Serpin» jobasy arqyly da eńbek kúshi tapshy óńirlerde jumys isteýge múmkindik berý kerek. Taǵy bir jańalyǵymyz - dúnıejúzilik janýarlar densaýlyǵy uıymynyń jerústi janýarlarynyń densaýlyǵy kodeksiniń usynystaryna sáıkes, veterınarııalyq statýarlyq organ (táýelsiz lıtsenzııa beretin organ) qurý josparlanyp otyr», - dedi Altynbek Úrkinbaev.

Sondaı-aq, mınıstrlik ókili veterınarııa salasy mamandarynyń jalaqysyna qatysty sóz qozǵady.

Aıtýynsha, veterınarlardyń tabysyn kóterý - vedomstvonyń mańyzdy mindetteriniń biri bolyp otyr.

«Atalǵan máseleni sheshýdiń birneshe jolyn qarastyryp jatyrmyz. Atap aıtqanda, veterınarııalyq qyzmetter tarıfin qaıta qaraý. Aqyly qyzmet túrleriniń kólemin ulǵaıtý jáne veterınar dárigerlerdiń júkteme normatıvin bekitý. Degenmen, bul usynystardyń depýtattarmen, múddeli memlekettik jáne jergilikti atqarýshy organdar, sol sııaqty bilim jáne ǵylym uıymdarynyń, bıznestiń, qoǵamdyq birlestikteri ókilderimen talqylanatynyn atap ótý qajet», - deıdi ol.

Aıta keteıik, otandyq veterınarııa salasyn reformalaý 2022-2026 jyldarǵa josparlanyp otyr.

Jáne ol agroónerkásip keshenin damytýdyń 2021-2030 jyldarǵa arnalǵan tujyrymdamasyn iske asyrýdyń aıasynda júzege aspaq.

Buǵan deıin bas sarapshy veterınarııa salasyna qatysty problemalarǵa taldaýdyń jasalǵanyn jáne ony sheshýdiń ádis-tásilderi týraly aıtqan edi.


Jańalyqtar

MURAǴAT