Elimizde aldaǵy 5-10 jylda 240-qa jýyq kásip paıda bolýy múmkin
2022 jylǵy 25 mamyr 10:00

Elimizde aldaǵy 5-10 jylda 240-qa jýyq kásip paıda bolýy múmkin

NUR-SULTAN. QazAqparat - Qazaqstanda aldaǵy 5-10 jylda ekonomıkanyń 9 salasynda 239 jańa kásip paıda bolýy múmkin, dep habarlaıdy QazAqparat.

Bul týraly Eńbek jáne halyqty áleýmettik qorǵaý birinshi vıtse-mınıstri Aqmádı Sarbasov Ózbekstanda ótip jatqan «Ortalyq Azııadaǵy ekonomıkalyq damý úshin tıimdi basqarý» halyqaralyq konferentsııasy barysynda aıtty.

«Bultty tehnologııalar, jasandy ıntellekt, robottandyrý bizdiń ómirimizdiń ajyramas bóligine aınaldy. Nátıjesinde eńbek naryǵyna jańa mamandyqtar enip jatyr. Qazaqstanda aldaǵy 5-10 jylda ekonomıkanyń 9 salasynda 239 jańa kásip paıda bolýy múmkin, al 95 kásip transformatsııalanýda. Bul rette eldegi jumys oryndarynyń 52%-y avtomattandyrýdyń joǵary táýekeline ushyraıdy. Árbir ekinshi qyzmetker qaıta daıarlaýdan ótýge májbúr bolady. Jańa daǵdylardy meńgerý - tabysty qyzmettiń kilti. Sondyqtan kadrlardy jyldam ári ıkemdi daıarlaý úshin jaǵdaı jasaý mańyzdy», – dedi Aqmádı Sarbasov.

Ol jaqyn arada jumys kúshiniń sapaly qurylymynyń ózgerýi jáne eńbekke qabiletti jastar aǵynynyń artýy múmkin ekenin, bul eńbek naryǵyna qosymsha júkteme ákeletinin atap ótti.

«2030 jylǵa qaraı Qazaqstandaǵy jumys kúshiniń 37%-y Z býyny bolady. Al urpaqtyń aýysýy jastardyń eńbek qyzmetine degen kózqarasynyń ózgerýimen qatar júredi. Bul ıkemdi jumys kestesi úshin qarjylyq jeńildikterge barýǵa daıyn urpaq, olar úshin kásibı jáne jeke ómir arasyndaǵy tepe-teńdik mańyzdy. Sondyqtan jumys berýshilerge talanttardy saqtap qalý úshin jańa talaptarǵa beıimdelý mańyzdy bolady», – dedi vıtse-mınıstr.


Jańalyqtar

MURAǴAT