Elimizde 11 jylda jol men kópir salý salasynda nebary 3 doktorant daıyndaldy

2022 jylǵy 28 qarasha, 13:23
Elimizde 11 jylda jol men kópir salý salasynda nebary 3 doktorant daıyndaldy

ASTANA. QazAqparat - Qazaqstandyq joǵary bilim berý júıesinde jekelegen «Avtojoldar men áýeaılaqtar salý» mamandyǵy joq, dep habarlaıdy QazAqparat.

«Kaztraffic-2022» halyqaralyq kórmesi aıasyndaǵy plenarlyq otyrysta L.Goncharov atyndaǵy Qazaq avtomobıl-jol ınstıtýtynyń birinshi prorektory Gúlsim Espaeva avtojol salasynda bilikti mamandardyń jetispeýshiligi máselesin kóterdi.

«Búgingi tańda kadr tapshylyǵy seziledi. Bul atalǵan mamandyq boıynsha túlekterdiń az bolýymen baılanysty. «Kólik qurylysy» baǵytynda daıyndyqty bar-joǵy 8 joǵary oqý orny júrgizedi», – dep atap ótti G.Espaeva óz baıandamasynda.

Bul pikirdi «QazjolǴZI» AQ prezıdenti Arman Álibaeva da qoldaıdy. Onyń aıtýynsha, jol mamandary jetispeýshiliginiń basty sebepteriniń biri - «Avtojoldar men áýeaılaqtar qurylysy» mamandyǵyn «Sáýlet jáne qurylys» baǵytyna qosý bolyp tabylady. Osyǵan baılanysty stýdentter, ıaǵnı bolashaq jolshylar óz mamandyqtary boıynsha jetkilikti bilim ala almaıdy. Nátıjesinde daıyndyq deńgeıi de, bilikti jol qurylysshylarynyń sany da kúrt tómendedi.

«Kóptegen jyldar boıy «Kólik qurylysy» mamandyǵy boıynsha doktorantýraǵa birde-bir bilim granty bólinbeı, nátıjesinde 11 jylda nebári 3 doktorant bilimin shyńdady. «Kólik qurylysy» daıyndyq baǵytyn jeke ashyp, toptarǵa bólý qajet», – deıdi Gúlsim Espaeva.

Máseleniń balama sheshimi retinde Qazaqstan jol ǵylymı-zertteý ınstıtýty jol salasy qyzmetkerlerin daıarlaý, qaıta daıarlaý jáne olardyń biliktiligin arttyrý boıynsha oqý ortalyǵynyń jumysyn jandandyrýda. Onda tek stýdentter ǵana emes, sonymen qatar tájirıbeli mamandar da bilimin jetildire alatynyn aıta ketý kerek.

«Jol qurylysyn qadaǵalaıtyn mamandardy oqytasyzdar ma?» degen suraqty jıi estimiz. Árıne, oqytamyz. Keıde qala qurylysy baǵyty boıynsha bilim alǵandar da biliktilikti arttyrý úshin oqý ortalyǵynyń mamandaryna júginip jatady», – deıdi «QazjolǴZI» AQ zerthanasynyń meńgerýshisi Meıramgúl Qabdyǵalıeva.


Uqsas jańalyqtar
Tegı:
Ǵylym   Jol  
Seriktester jańalyqtary

Jańalyqtar