Jańalyqtar  >
  Sport

Elge oralý qashanda qýanysh – Elena Rybakına Almatyǵa keldi

2022 jylǵy 30 qarasha, 18:07
Elge oralý qashanda qýanysh – Elena Rybakına Almatyǵa keldi

ASTANA. QazAqparat – Tennısten Qazaqstan áıelder quramasynyń kóshbasshysy Elena Rybakına Almaty qalasyna keldi, dep habarlaıdy QazAqparat tilshisi.

Qazaqstan tennıs federatsııasynan málim etkenindeı, sportshy jýrnalıstermen ótken baspasóz máslıhatynda Ýımbldondaǵy tabysy, sondaı-aq jańa maýsymdaǵy oı-josparymen bólisti.

«Eń aldymen meni jyly qabyldaǵanyńyz úshin alǵysymdy aıtamyn. Ýımbldondaǵy jeńisten keıin Astanaǵa ushyp kelip, jankúıerlerimmen kezdestim. Astanadan keıin Almatyǵa kelýim kerek edi. Biraq ózimdi jaısyz sezingendikten, saparymdy keıinge qaldyrdym. Mine, sonyń sáti endi týyp otyr. Osynda sizdermen áńgime dúken quryp, jas tennısshilermen sheberlik saǵatyn ótkizýge múmkindik alǵanyma qýanyshtymyn», dedi E.Rybakına.

Elena Rybakına jeltoqsan aıynyń ortasynda Ábý-Dabıde ótetin kórme-jarysqa qatysatynyn, sosyn Dýbaıda jańa maýsymǵa daıyndalatynyn jetkizdi. Qazaqstannyń birinshi raketkasynyń jańa jyldaǵy alǵashqy jarysy Aýstralııanyń ashyq chempıonaty bolmaq.

Baspasóz máslıhatynan keıin tennıs ortalyǵynyń tárbıelenýshileri ataqty sportshymen kortqa shyqty. Elena balalarmen birge jattyǵyp, sheberlikterin arttyrý baǵytynda aqyl-keńesin aıtyp, suraqtaryna jaýap berdi.

Eske sala keteıik, budan buryn Mıhaıl Kýkýshkınniń álemdegi úzdik 200 tennısshiniń qataryna qaıta kirgenin jazǵan bolatynbyz.


Uqsas jańalyqtar
Tegı:
Seriktester jańalyqtary

Jańalyqtar