Jańalyqtar  >

Elge kelip jatqan reseılikter tarapynan quqyq buzýshylyq tirkelgen joq – mınıstr Ahmetjanov

2022 jylǵy 30 qyrkúıek, 16:54
Elge kelip jatqan reseılikter tarapynan quqyq buzýshylyq tirkelgen joq – mınıstr Ahmetjanov

ÓSKEMEN. QazAqparat – QR Іshki ister mınıstri Marat Ahmetjanov elge kelip jatqan reseılikterge qatysty birde-bir quqyq buzýshylyq tirkelmegenin málim etti, dep habarlaıdy QazAqparat tilshisi.

Búgin Marat Ahmetjanov Shyǵys Qazaqstan oblysynyń turǵyndarymen eseptik kezdesý ótkizý úshin Óskemen qalasyna keldi. Jıyn barysynda azamattardyń biri Reseıden elge kelip jatqan mıgranttardyń kóbeıýine qatysty alańdaýshylyq bildirdi.

«Rasymen de, sońǵy jaǵdaılarǵa baılanysty kórshi elden Qazaqstanǵa kelýshiler artty. Biz quqyq qorǵaý organy retinde olardyń qaýipsizdigin qamtamasyz etýge mindettemiz. Alaıda sheteldikter tarapynan azamattarymyzdyń tynyshtyǵyn buzyp, qoǵamdyq tártipti saqtamaǵandar anyqtalsa onda zań sheńberinde tıisti shara qabyldaımyz», - dedi QR Іshki ister mınıstri.

Onyń aıtýynsha, ózge memleketten kelgenderdiń barlyǵy Qazaqstannyń ishki zańyna baǵynýy tıis.

«Qazirgi ýaqytta reseılikter tarapynan birde-bir qylmys jáne ákimshilik quqyq buzýshylyq tirkelmedi. Jalpy jyl saıyn elimizge álemniń túkpir-túkpirinen 6 mıllıonnan astam adam keledi. Mıgratsııalyq polıtsııa qyzmetkerleri óz jumystaryn úzdiksiz atqarýda. Sondyqtan alańdaýǵa esh negiz joq», - dedi Marat Ahmetjanov.


Uqsas jańalyqtar
Seriktester jańalyqtary

Jańalyqtar