Elena Rybakına Rım týrnıriniń shırek fınalyna shyǵa almady
2022 jylǵy 12 mamyr 18:29

Elena Rybakına Rım týrnıriniń shırek fınalyna shyǵa almady

NUR-SULTAN. QazAqparat – Qazaqstannyń birinshi, álemniń 17-raketkasy Elena Rybakına Rım WTA 1000 týrnıriniń shırek fınalyna shyǵa almady, dep habarlaıdy QazAqparat tilshisi.

Qazaqstandyq tennısshi úshinshi aınalymda álemniń 29-raketkasy, shveıtsarııalyq Hıl Belen Taıhmanmen sheberlik baıqasty.

Osydan bir apta buryn E.Rybakına Madrıd jarysynda shveıtsarııalyq sportshydan 3:6, 1:6 esebimen jeńilip qalǵan edi.

Bul joly match áldeqaıda tartysty órbidi.

Birinshi partııada qazaqstandyq tennısshi taı-breıkte ábjildik tanytty – 7:6 (7:4).

Ekinshisinde Taıhmann ese qaıyrdy – 6:3.

Úshinshi, sheshýshi sette E.Rybakına 4:2 esebimen alǵa ketti. Áıtse de qarsylasy tarazy basyn teńestire aldy – 4:4. Elena taǵy bir breıkke qol jetkizip, matchqa dop bergenimen, sol múmkindigin múlt jiberdi – 5:5. Esep 5:6 bolǵan mezette medıtsınalyq kómekke de júgindi. Sodan keıin shveıtsarııalyq sportshy oıyndy breıkpen bitirdi – 7:5.

Asa tartysty ótip, 3 saǵatqa jýyq ýaqytqa sozylǵan báseke barysynda E.Rybakına 2 eıs jasap, 17 breık-poınttyń altaýyn paıdalandy. Taıhmann 6 eıs, 9 breıkpen kózge tústi.

Taıhmann júlde qory 2,5 mln eýrodan asatyn dodanyń jartylaı fınalyna shyǵý úshin álemniń 3-raketkasy, ıspanııalyq Paýla Badosa nemese reıtıngte 23-satydaǵy reseılik Darıa Kasatkınanyń bireýimen talasady.

Eske sala keteıik, budan buryn ıÝlııa Pýtıntsevanyń Rımde álemniń burynǵy birinshi raketkasyn utqanyn, qazaqstandyq tennısshiniń Shymkent týrnıriniń jartylaı fınalyna shyqqanyn jazǵan bolatynbyz.





Uqsas jańalyqtar

Jańalyqtar

Úrdis

MURAǴAT