Elena Rybakına alǵash ret Ýımbldon týrnıriniń shırek fınalyna shyqty
2022 jylǵy 4 shilde 20:04

Elena Rybakına alǵash ret Ýımbldon týrnıriniń shırek fınalyna shyqty

NUR-SULTAN. QazAqparat – Qazaqstannyń birinshi, álemniń 23-raketkasy Elena Rybakına alǵash ret Ýımbldon týrnıriniń shırek fınalyna shyqty, dep habarlaıdy QazAqparat tilshisi.

Ulybrıtanııa ashyq chempıonatynyń 17-raketkasy bolyp tirkelgen E.Rybakına tórtinshi aınalymda dúnıejúzilik reıtıngte 80-orynda turǵan horvatııalyq Petra Martıchpen sheberlik baıqasty.

Birinshi partııa barysynda P.Martıch alǵa ketkenimen, Elena esesin jibermedi. Esep 5:5 bolǵan mezette óz geımin alyp, setti breıkpen támamdady – 7:5.

Ekinshi partııada E.Rybakına sol qarqynyn báseńdetken joq – 6:3.

1 saǵat 22 mınýtqa sozylǵan báseke barysynda qazaqstandyq sportshy 6 eıs jasap, 7 breık-poınttyń 4-eýin paıdalana bildi.

E.Rybakına jartylaı fınalǵa shyǵý úshin álemniń 37-raketkasy, frantsııalyq Alıze Korne nemese reıtıngte 44-satyda turǵan aýstralııalyq Aıla Tomlıanovıchtiń bireýimen talasady. A.Korne munyń aldynda osyǵan deıin 37 match boıy jeńilmegen álemniń 1-raketkasy, Polsha ókili Iga Sventekti utyp ketken bolatyn – 6:4, 6:2.

Eske sala keteıik, budan buryn elordada Prezıdent kýbogy úshin tennısten halyqaralyq týrnırler ótetinin jazǵan bolatynbyz.

Sondaı-aq qazaqstandyq jas tennısshiler halyqaralyq týrnırlerde jaqsy nátıje kórsetti.



Uqsas jańalyqtar

Jańalyqtar

Úrdis

MURAǴAT