+7 (701) 759 90 19
USD 425.73 EUR 498.32
RUB 5.8 CNY 65.85
Jańalyqtar

Elena Hardına: Qazaqtyń qumaı tazysy áli álemdi moıyndatady

2021 jylǵy 31 shilde 12:33
Bólisińiz:
Elena Hardına: Qazaqtyń qumaı tazysy áli álemdi moıyndatady

ÓSKEMEN. QazAqparat – «Jaqsy ıt ıesiniń kóz-qulaǵy» deıdi. Tazylardyń eń júırigi qazaqtyń qumaı tazysynyń kıeli tuqymy ýaqyt ótse de óz qundylyǵyn joǵaltqan emes. Muny kámil túısingen jandardyń biri - óskemendik Elena Hardına.

Búginde ol Qazaqstan kınologtary odaǵy ulttyq tuqymdar klýbyna jetekshilik etedi. Álem boıynsha ótetin dúnıejúzilik ıtter baıqaýynda «Tazylar» nomınatsııasy boıynsha jeńimpaz atanǵany da bar.

Qazaqparat tilshisi tazy baptaýshymen jolyǵyp, áńgimelesip qaıtqan bolatyn.

«Ashtyqtyń yzǵary esken zamanda eki-úsh tazy bildeı bir aýyldy qorekpen qamtamasyz etip turǵan. Qazaqtyń qumaı tazysynyń basqa ıtterden aıyrmashylyǵy da osynda. Ol azyqty adamnyń kómeginsiz-aq izdep taýyp alady, sebebi onyń kórý, sezý jáne estý qabileti erekshe. Óz qaramaǵymda 9 tazy ıtim bar. Asqan tazalyqty qajet etetin ıttiń bul tuqymyn kútip-baptaǵanda barynsha muqııat bolý qajet», - dedi Elena Hardına.

Úıdegi qojaıyn ózi bolǵandyqtan tórt aıaqty dostary aıtqanynan shyqpaıtyn kórinedi. Keı jaǵdaıda qonaqtar sháýildek kúshigin erte kelse, tártipke baǵynǵan janýarlar shekten shyǵyp bara jatqandaryna bir sát azý tisin aqsıtyp ses kórsetedi. Odan esh nátıje bolmasa, egesinen buzaqyny tártipke salý úshin ruqsat suraǵandaı renishti de susty keıip tanytady. Osydan baryp, Hardına hanym tazyny múlde qıyndyq týǵyzbaıtyn, áýre-sarsańǵa salmaıtyn aqyldy da parasatty jeti qazynanyń biri degenge toqtaldy.

«Qazaq jeriniń ulan-ǵaıyr alqapqa ıe bolyp, klımatynyń ózgerip otyrýy tazy ósirýde orasan basymdyq berdi. Almatyda kún ystyq, ıtteri de usaq keledi. Baýyryn jazyp júgireıin dese qar joq. Shyǵysta qys qytymyr, kúz ortasyndaǵy qara sýyq ta ótimdi. 10 jyl buryn Almatydan tazylar ákelgende qysta júnderi qalyńdamaı, qatty jaýraǵan edi», - deıdi keıipkerimiz.

Onyń aıtýynsha, oblystaǵy tazylardyń naqty sanyn aıtý múmkin emes. El kóleminde tekti tuqymdylardyń sany – 1000-nan asyp jyǵylady.

«Olardyń birshamasyna qujat daıyndaýda qıyndyqtar týyndaýda. Sebebi Halyqaralyq kınologtar federatsııasynyń bekitken talaby boıynsha tazynyń eki jaqty tegin qujatqa túsirý – basty mindetterdiń biri. Osyny oryndasaq qana, federatsııa qumaı tazyny bizdiń ulttyq qundylyq retinde tanıdy», - deıdi Elena Hardına.

Álem boıynsha ótetin dúnıejúzilik ıtter baıqaýy 2016 jyly Reseı jerinde uıymdastyrylǵan bolatyn. Bul saıysqa tazy tuqymy boıynsha el namysyn qorǵaýǵa Elena Hardına qatysqan. Óskemendik tazy baptaýshy sol baıqaýda «Tazylar» nomınatsııasy boıynsha jeńimpaz atanyp, abyroıymyzdy asqaqtatyp qaıtqan-tuǵyn.

«Sol bir sátte qýanyshymda shek bolmady. Bul men úshin úlken jetistik. Aldaǵy ýaqytta da osyndaı baıqaýlarǵa qatysý nıetim bar. Qazaqtyń qumaı tazysy áli álemdi moıyndatady», - dedi ol.

Aıta keteıik, osydan bir jyl buryn keıipkerimiz Qazaqstan kınologtary odaǵy ulttyq tuqymdar klýbynyń atynan tazy ıtteriniń barlyq ıelerine úndeý joldaǵan. Sol úndeýde ol qazaq tazysyn basqa tuqymdarmen aralastyrmaı qanyn taza saqtaýǵa shaqyrdy.


Bizdiń kanalymyzǵa jazylyńyz:

Bólisińiz:

Avtor:

Talǵatjan Muhametbekuly

Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Úmbet Sholpan
Úmbet Sholpan
954-059
REDAKTOR
Kojakeldıev E.
Kojakeldıev E.
954-059

MURAǴAT