+7 (701) 759 90 19
USD 423.95 EUR 495.81
RUB 5.84 CNY 65.6
Jańalyqtar

Eldos Smetov kelesi Olımpıada týraly: Óte aýyr suraq

2021 jylǵy 24 shilde 18:26
Bólisińiz:
Eldos Smetov kelesi Olımpıada týraly: Óte aýyr suraq

NUR-SULTAN. QazAqparat - Dzıýdodan Tokıo Olımpıadasynyń qola júldegeri atanǵan Eldos Smetov Olympic.kz saıtyna suhbat berip, ekinshi Olımpıadadaǵy ekinshi medaline qatysty oıymen bólisti.

«Shyny kerek, men qola emes, altyn alamyn dep keldim. Rıo Olımpıadasynan keıin tatamıden alystap ketpeı, úlken sportta qalýymnyń da bir sebebi osy edi. Kúmisten keıin altyn alǵym keldi. Elimizdiń ánuranyn sharyqtatyp, kók baıraǵymyzdy bıikten kórýdi armandadym. Sol úshin tynbaı eńbek ettim de. Biraq maǵan buıyryp turǵany qola júlde eken.

Men barymdy saldym. Sportqa arnaǵan osynsha jyldaǵy bar ónerimdi, bar kúshimdi búgin Tokıo tatamıine tastap shyqtym. Boıymda kúreske degen qandaı qasıet bolsa, sonyń birin de aıap qalmadym. Jartylaı fınaldaǵy jekpe-jekti kórdińizder. Óte tartysty ótti. Qaıta-qaıta shabýylǵa ıek artyp, qarsylasymdy tuqyrtýǵa tyrystym. Alaıda, jeńis búgin meniń jaǵymda emes eken.

Iá, japondyq balýan Naohısa Takato menimen kezdesýge fınaldyq beldesýge shyqqandaı daıyndyqpen keldi. Onyń fınalǵa jáne oǵan deıingi jekpe-jekterge qalaı daıyndalǵanyn kórdim. Jartylaı fınalǵa erekshe ásermen bettedi. Ekeýmiz talaı márte kezdesip júrmiz. Bir-birimizdi jaqsy bilemiz. Búgingi beldesýdiń tym uzaqqa sozylǵanynyń sebebi de osy.

2020 jyldyń basynda biz naǵyz babymyzda boldyq. Alaıda, álemdegi pandemııa salqynyn tıgizdi. Segiz-toǵyz aı boıy birde bir jarysqa qatysqan joqpyz. Dese de, bul kúnderdiń bári artta qaldy, qıyndyqtyń bárin jeńip shyqtyq. Soǵan qýanamyn.

Al kelesi Olımpıada týraly ne aıtýǵa bolady? Parıj Olımpıadasyna barý-barmaýym jaıly eshteńeni kesip aıta almaımyn. Óte aýyr suraq. Maǵan áli tynyǵyp, densaýlyǵymdy durystaý kerek. Sizderge kórinbegenmen, meniń ǵana janyma batatyn jaraqattar bar. Solardy emdeý kerek. Joǵaryda aıttym, meniń armanym – Olımpıada altynyn alý. Mine, ekinshi Olımpıadada altynǵa synyq súıem jerden toqtap otyrmyn. Men almasam ba, meniń baýyrlarym, qazaq dzıýdoshylary Olımpıada chempıony atansa, sodan artyq baqyt joq!

Jarys munymen bitken joq. Áli elimizdiń namysyn qorǵaıtyn tórt balýanymyz bar. Solarǵa sáttilik, jeńis tileımin», - dedi Smetov.

Eske salsaq, Eldos Smetov Tokıo Olımpıadasynyń qola júldesi úshin ótken beldesýde Nıderland balýanynan basym tústi.


Bizdiń kanalymyzǵa jazylyńyz:

Bólisińiz:
Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Janat Qapalbaeva
Janat Qapalbaeva
954-059

MURAǴAT