Eldi damytýǵa múgedektigi bar adamdardyń áleýetin de paıdalaný kerek – mınıstr
2022 jylǵy 5 shilde 13:53

Eldi damytýǵa múgedektigi bar adamdardyń áleýetin de paıdalaný kerek – mınıstr

NUR-SULTAN. QazAqparat – Múgedektigi bar adamdardy áleýmettik qoldaý úshin bıyl memlekettik bıýdjetten 600 mlrd teńgeden astam qarjy bólindi. Bul týraly Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova málim etti, dep habarlaıdy QazAqparat tilshisi.

«Múgedektigi bar adamdardy áleýmettik qoldaý keshendi júıesi aıasynda áleýmettik qamsyzdandyrýdyń úsh deńgeıli júıesi jumys isteýde. Búginde osy úsh kózden beriletin jıyntyq tólemdi 530 myńǵa jýyq adam alyp otyr. Áleýmettik qyzmet kórsetý júıesinde 87 myń adamǵa memlekettiń kepildirilgen arnaıy áleýmettik qyzmeti kórsetilýde. Tehnıkalyq quraldarmen 181 myń adam qamtyldy. 4 myńǵa jýyq múgedektigi bar azamatqa ataýly áleýmettik kómek qarastyryldy», - dedi Tamara Dúısenova Úkimettiń búgingi otyrysynda.

Mınıstrdiń aıtýynsha, osy baǵdarlamalardy júzege asyrý úshin memlekettik bıýdjetten bıyl 600 mıllıard teńgeden astam qarjy bólingen.

«Qol jetken múmkindikter – Úkimettiń, qoǵamdyq birlestikterdiń jáne úkimettik emes uıymdardyń birlesken qyzmetiniń nátıjesi. Alaıda bastalǵan reformany áli de tereńdete túsýdi qajet etetin birqatar jańa problemalar men sheshimin tappaǵan máseleler de bar. Naqtyraq aıtsaq, áleýmettik qyzmetkerler ınstıtýtyn tolyq qalyptastyrý jáne jergilikti atqarýshy organdardyń áleýmettik qyzmetterine rebrendıng jasaý kerek. Sondaı-aq, kórsetiletin qyzmetterdiń balama úlgileriniń aıasyn keńeıtý, tsıfrlyq tehnologııalardy engizý jáne eldi damytýǵa múgedektigi bar adamdardyń áleýetin de paıdalaný úshin olardy ońaltý júıesin jaqsartý qajet», - dedi Tamara Dúısenova.

Buǵan deıin Eńbek mınıstri múgedektigi bar adamdardy jumyspen qamtý máselesin kótergen edi. Búginde múgedektigi bar 100 myń azamat jumys istep júr. Bul – eńbek jasyndaǵy múgedektigi bar adamdardyń tórtten biri ǵana degen sóz.

Sonymen birge, aýyldyq jerlerde múgedektigi bar jandarǵa qyzmet kórsetetin syıymdylyǵy shaǵyn úıler ashylady.


Seriktester jańalyqtary

Jańalyqtar

Úrdis

MURAǴAT