Elbasy birqatar kezdesý ótkizdi

NUR-SULTAN. QazAqparat – Elbasy birqatar kezdesý ótkizdi. Bul týraly QazAqparat elbasy.kz saıtyna silteme jasap habarlaıdy.

Elbasy Ulttyq múddeler ortalyǵynyń prezıdenti, «The National Interest» jýrnalynyń baspageri Dmıtrıı Saımspen kezdesti.

Kezdesý barysynda taraptar jahandyq kún tártibine qatysty pikir almasty, sondaı-aq álemniń jetekshi derjavalary arasyndaǵy dıalogty jolǵa qoıý jónindegi sharalardy talqylady.

Elbasy AQSh-Reseı qatynastarynyń sarapshysy retinde Dmıtrıı Saımstyń «Astana klýbynyń» jumysyna qatysýynyń mańyzdylyǵyn atap ótti.

Sondaı-aq, Nursultan Nazarbaev Eýropalyq Komıssııanyń burynǵy tóraǵasy Joze Manýel Barrozýmen kezdesti.

Kezdesý barysynda Elbasy Joze Manýel Barrozýǵa «Astana klýbynyń» jumysyna qatysqany úshin alǵysyn bildirdi.

«Bizdiń dostyǵymyz burynnan beri jalǵasýda. Sizdiń Eýropalyq Komıssııaǵa tóraǵalyǵyńyz kezinde biz keńeıtilgen seriktestik týraly kelisimge qol qoıdyq. Ózińizge belgili, men Eýrazııalyq ekonomıkalyq odaqtyń qurmetti tóraǵasymyn. Endi bizdiń uıymymyz ben Eýropalyq Odaq arasyndaǵy yntymaqtastyqty jolǵa qoıý mańyzdy», - dedi Qazaqstannyń Tuńǵysh Prezıdenti.

Óz kezeginde Joze Mannýel Barrozý Qazaqstannyń Eýropa elderimen seriktestigin qol jetkizilgen kelisim aıasynda odan ári keńeıtýdiń mańyzdylyǵyn atap ótti.