Jańalyqtar  >

Ekibastuzǵa Tótenshe jaǵdaılar mınıstrliginiń qosymsha kúshteri men quraldary jiberildi

2022 jylǵy 2 jeltoqsan, 18:07
Ekibastuzǵa Tótenshe jaǵdaılar mınıstrliginiń qosymsha kúshteri men quraldary jiberildi

EKІBASTUZ. QazAqparat – Búgin QR Tótenshe jaǵdaılar mınıstrligi Ekibastuz qalasyna qosymsha kúshter men quraldar jiberdi, dep habarlaıdy QazAqparat.

«Oǵan Astana qalasy, Aqmola, Jambyl jáne Qaraǵandy oblystarynyń Tótenshe jaǵdaılar departamentteriniń qutqarýshylary jáne 52859 áskerı bóliminiń jeke quramy endi. Baǵyttalǵan kúshter men quraldar jylytý quraldarymen (jylý pýshkalary), elektr qýatynyń derbes kózderimen, jaryqtandyrý aspaptarymen jáne baılanys quraldarymen jasaqtalǵan», - delingen QR TJM baspasóz qyzmetiniń málimetinde.
Qazir TJM-niń kúshteri men quraldary Ekibastuz jylý jelileriniń avarııalyq ýchaskeleri boıynsha bólindi. Kommýnaldyq qyzmettermen birlesip jylýmen jabdyqtaý boıynsha jumystar júrgizilip jatyr. Sonymen qatar kommýnaldyq qyzmetter men múdelli uıymdardyń jylytý pýnkteri ornatyldy.
Aıta keteıik, Tótenshe jaǵdaılar mınıstrliginiń Pavlodar oblysyndaǵy bólimsheleri apattyń alǵashqy kúnderinen kommýnaldyq qyzmetterge kómekke jumyldyryldy.
Aýrýhanalarda jatqan balalar men patsıentterdi Ekibastuz qalasynan Pavlodar qalasyna evakýatsııalaýǵa kómek kórsetildi. Jertólelerdi jylytý maqsatynda benzın generatorlary ornatylyp, jylý pýshkalarynyń jumys isteýi qamtamasyz etildi. Budan bólek, sý basqan oryndardan sý soryp shyǵarý úshin sorǵylar qoldanyldy.

Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.

Keıinirek jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.

Ekibastuz qalasynyń oqýshylary onlaın oqýǵa kóshirildi.

28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.

30 qarashada Ekibastuzǵa Premer-Mınıstr Álıhan Smaıylov baryp, kináliler jaýapqa tartylatynyn aıtty.


Uqsas jańalyqtar
Seriktester jańalyqtary

Jańalyqtar