Jańalyqtar  >

Ekibastuzdyń 3 shaǵyn aýdanyna áli jylý berilgen joq – qala ákimi

2022 jylǵy 27 qarasha, 21:50
Ekibastuzdyń 3 shaǵyn aýdanyna áli jylý berilgen joq – qala ákimi

ASTANA. QazAqparat – Ekibastuzdyń úsh shaǵyn aýdany turǵyndary áli jylýsyz otyr. Bul týraly Ekibastuz qalasynyń ákimi Aıan Beısekın aıtty, dep habarlaıdy QazAqparat tilshisi.

«Qazirgi ýaqytta Ekibastuz jylý elektr ortalyǵyndaǵy ahýal turaqtandy. Úsh sý ysytatyn jáne eki energetıkalyq qazandyq shtattyq rejımde jumys istep tur. Taǵy bir sý ysytatyn qazandyqty paıdalanýǵa berý úshin qajetti is-sharalar qabyldanyp jatyr. Bul tún ortasyna qaraı temperatýra parametrin jylý berý kezinde 80 paıyzǵa jáne qubyrmen aıdaý kezinde shamamen 65 paıyzǵa jetkizýge múmkindik berer edi. Ol qalany jylýmen jabdyqtaýdaǵy ahýaldy turaqtandyrýǵa septigin tıgizedi», - dedi Aıan Beısekın.

Onyń atap ótýinshe, qalanyń jylý jelileriniń jaı-kúıi mańyzdy máselelerdiń biri bolyp tur. Oryn alǵan problemalar qala aýmaǵynda qubyrdyń jarylýynan boldy. Qazirgi ýaqytta №2 jylý magıstraliniń búlingen jerlerin jóndeý jumystary júrgizilip jatyr. Qajetti resýrstar shoǵyrlanǵan. Jóndeý brıgadalary jarylǵan jerlerdi jamaýǵa kirisip ketti.

«Qazirgi ýaqytta 3 shaǵyn aýdan jylýmen qamtamasyz etilmeı otyr. №2 jylý magıstrali ajyratylǵan. Shamamen 130 kópqabatty turǵyn úı men 100 jeke turǵyn úı jylýsyz otyr. Biraq, biz áriptesterimizben, turǵyn úı ınspektsııasymen birge jylý qubyry qatyp qalmaýy úshin jumys istep jatyrmyz. Barlyq qajetti is-sharalar ýaqytynda júrgizilip, túsindirý jumystary qolǵa alynǵan», - dedi qala basshysy.


Uqsas jańalyqtar
Seriktester jańalyqtary

Jańalyqtar