Ekibastuzdaǵy apat: Roman Sklıar Úkimet basshysyna jaǵdaıdy baıandady

2022 jylǵy 4 jeltoqsan, 16:48
Ekibastuzdaǵy apat: Roman Sklıar Úkimet basshysyna jaǵdaıdy baıandady

ASTANA. QazAqparat – Ekibastuz qalasynda júrgen Premer-Mınıstrdiń birinshi orynbasary Roman Sklıar telefon arqyly Úkimet basshysy Álıhan Smaıylovqa qalalyq jylý jelilerindegi apattyń zardaptaryn joıý barysy týraly baıandady. Bul týraly QazAqparat Úkimettiń telegram kanalyna silteme jasap habarlaıdy.

Vıtse-premer 4 jeltoqsandaǵy tańerteńgi jaǵdaı boıynsha 5A, 5B jáne 6 shaǵyn aýdandarda 11 turǵyn úıge jylý berý boıynsha jumys jalǵasyp jatqanyn málimdedi. Daıyndyq deńgeıi joǵary, sondyqtan keshke deıin olardyń jelileri (jertóleler) jylýǵa qosylady dep josparlanyp otyr. Sonymen qatar, bul úılerde jylý radıatorlary men jetkizý jelileri aýystyrylyp jatyr. Keshke páterlerge jylý berile bastaıdy.


Premer-Mınıstrdiń birinshi orynbasary jylý berilgen úılerdiń ishki ınjenerlik kommýnıkatsııalary – káriz qubyrlaryn, sýmen jabdyqtaý júıelerin jáne t.b. aýystyrý qajet ekenin jáne bul jumystyń Úkimettiń baqylaýynda ekenin aıtty.


Jylý tolyǵymen berilmeıinshe, jóndeý jumystaryna tartylǵan birde-bir uıym bul úılerden ketpeıdi. Qazirgi ýaqytta barlyǵy 484 adam jumyldyrylǵan. Biz óz jumysymyzdyń formatyn tolyǵymen ózgerttik, ol táýlik boıy júrgiziledi, -

dedi Roman Sklıar.


Premer-Mınıstr barlyq jumystardy tezirek aıaqtap, turǵyndardy jylýmen qamtamasyz etý qajettigin atap ótti.

Jumysty jalǵastyryńyz. Qalǵan úılerdiń barlyǵyna jylýdy tezirek qosý kerek, adamdar bir apta boıy jylýsyz otyr. Eshkim memlekettiń kómeginsiz qalmaıdy, barlyǵy nazarǵa alynǵan, -

dedi Álıhan Smaıylov.

Foto: primeminister.kz


Uqsas jańalyqtar
Seriktester jańalyqtary

Jańalyqtar