Ekibastuzda jylý júıesine keń aýqymdy jóndeý júrgiziledi - Úkimet
ASTANA. QazAqparat - Memleket basshysynyń tapsyrmasyna sáıkes Úkimet jáne Pavlodar oblysynyń ákimdigi Ekibastuz turǵyndarynyń páterlerinde jáne qaladaǵy áleýmettik nysandarda temperatýralyq rejımdi turaqtandyrý boıynsha keshendi sharalar qabyldaýda, dep habarlaıdy QR Úkimetiniń baspasóz qyzmeti.
Seısenbi, 7 aqpanda, QR Premer-Mınıstriniń birinshi orynbasary Roman Sklıardyń tóraǵalyǵymen ótken arnaıy keńeste jylý jelileriniń birqatar ýchaskelerin aýystyrý jáne JEO-da jóndeý jumystaryna daıyndyq máseleleri qaraldy.
Sol kúni Ekibastuzǵa Energetıka, Indýstrııa jáne ınfraqurylymdyq damý mınıstrlikteriniń, «TKSh QazOrtalyǵy» AQ, Atom jáne energetıkalyq qadaǵalaý men baqylaý komıtetiniń ókilderi bardy. Jóndeý barysymen tanysqannan keıin jumys tobynyń músheleri áleýmettik nysandar men kóp páterli turǵyn úılerge bardy.
Búgingi tańda Ekibastuz JEO-da 5 qazandyq – 2 energetıkalyq jáne 3 sý jylytatyn qazandyq jumys isteıdi. Taǵy 5 qazandyq jóndelip jatyr. Sonymen qatar jylý jelilerindegi aqaýlardy joıý jumystary táýlik boıyna atqarylýda. Qazirgi ýaqytta kvartal ishindegi ýchaskelerde tirkelgen 9 aqaýdy jóndeý jumystary júrip jatyr.
Sonymen qatar Ekibastuzda jylý berý temperatýrasyn retteý jumystary jalǵasýda. Normatıvke sáıkes, ol 77/53oS (shyǵý kezinde) bolýy kerek, qazirgi kezdegi naqty kórsetkish – 64/45oS (shyǵý kezinde). Sonymen qatar syrtqy aýa temperatýrasy -21oS-qa jetedi.
6 aqpanda jylytýdyń temperatýralyq parametrleriniń tómendeýine baılanysty qala mektepterin qashyqtan oqytý formatyna kóshirý týraly sheshim qabyldandy. Jumys aıaqtalǵannan keıin shtattyq oqytý rejımi qalpyna keltirilmek.
Aıta ketý kerek, qalada qalypty deńgeıde jylý berilmeı otyrǵan 28 kóp páterli turǵyn úı bar. Osyǵan baılanysty jylytý maýsymy kezeńinde atalǵan úılerdiń jylýmen jabdyqtaý júıelerin jóndep, neǵurlym joǵary parametrler boıynsha jylý berý týraly sheshim qabyldandy. Jumystardy tıisti kommýnaldyq kásiporyndar júrgizetin bolady.
Sonymen qatar qalada jylytý maýsymy aıaqtalǵannan keıin bastalatyn keń aýqymdy jóndeý naýqanyna daıyndyq júrgizilýde. Búgingi tańda qalalyq jylýmen jabdyqtaý júıelerine tehnıkalyq aýdıt júrgizilip jatyr, qorytyndysy boıynsha ony keshendi qalpyna keltirý sharalary aıqyndalatyn bolady. Jalpy uzyndyǵy shamamen 5 km bolatyn tórt jylý torabyn rekonstrýktsııalaý úshin JSQ daıynalyp, qazir olar memlekettik saraptamadan ótip jatyr. Sonymen qatar qalanyń kvartal ishindegi 400 km jelilerin jóndeýge esepter daıyndaldy.
Aýqymdy jóndeý naýqanyn júrgizý jáne qarjylandyrý kózderin aıqyndaý úshin oblys ákimdigi men «OAEK» AQ arasynda jaýapkershilikti bólisý boıynsha memorandým jobasy ázirlendi.
Tutynýshylarǵa jylý energııasy úshin tólemdi qaıta esepteý úshin jylýmen jabdyqtaý qyzmetteriniń qunyn esepteýdiń jańa algorıtmi jasalǵanyn atap ótken jón.
Oblystaǵy jylytý maýsymyn ótkizý barysy QR Úkimetiniń erekshe baqylaýynda.
Foto: t.me/KZgovernment
