Ekibastuz qalasynyń oqýshylary onlaın oqıtyn boldy

2022 jylǵy 27 qarasha, 20:30
Ekibastuz qalasynyń oqýshylary onlaın oqıtyn boldy

ASTANA. QazAqparat – Ekibastuzda jylý jelisindegi apat saldaryn joıý jumystary jalǵasyp jatyr. Qalada jylý bolmaýyna baılanysty balabaqshalar jumysyn toqtatyp, mektep oqýshylary qashyqtan oqıtyn boldy, dep habarlaıdy QazAqparat tilshisi.

Ekibastuz qalasynyń bilim berý uıymdaryndaǵy jylý parametrleriniń tómendeýine baılanysty 28 qarashadan qala mektepterinde bilim berý qashyqtan oqytý formatyna kóshirilip, balabaqshalar jumys istemeıdi

, - delingen óńirdiń bilim berý basqarmasy taratqan aqparatta.

Degenmen, aýyl mektepteriniń oqýshylary shtattyq rejımde bilim alady.

Ómirlik qıyn jaǵdaıǵa tap bolǵan balalardy qoldaý ortalyǵy men «Jas órken» jasóspirimder úıi» KMM-den 47 bala Pavlodarǵa qonys aýdarǵany belgili. Sonymen qatar, oblystyq kópbeıindi lıtseıdiń 29 oqýshysy «Bilim ınnovatsııa» lıtseıine aýystyryldy. Jalpy, Ekibastuzda 25 mektep jáne olarda bilim alatyn 21 341 oqýshy bar.

Sondaı-aq, Ekibastuz qalalyq aýrýhanasynda 300 naýqas em alyp jatyr. Jergilikti bılik qajet bolǵan jaǵdaıda olardy da basqa jerge aýystyratyndyqtaryn habarlap otyr. Osy maqsatta Pavlodar men Aqsý qalasynda 317 tósek-oryn daıyndalǵan.

Sanıtarlyq kólikpen 14 adamdy, onyń ishinde 7 balany Pavlodarǵa jetkizý josparlanyp otyr. Buǵan qosa, psıhıtarııalyq saýlyq ortalyǵynan 31 naýqasty, olarmen ilese júretin 3 qyzmetkerdi evakýatsııalaý kózdeledi

, - dep atap ótedi Pavlodar oblystyq ákimdiginen.


Uqsas jańalyqtar
Seriktester jańalyqtary

Jańalyqtar