Ekibastuz ben Rıdderde jylý tarıfi qanshalyqty ósedi
ASTANA. QazAqparat – Ulttyq ekonomıka mınıstri Álibek Qýantyrov Úkimet kýlýarynda kommýnaldyq tarıfterdi meılinshe baıaý kóterýdi josparlap otyrǵanyn aıtty, dep habarlaıdy QazAqparat tilshisi.
«Byltyrǵy kommýnaldyq kollapstan keıin keıin tarıf boıynsha túsinikti sandar paıda boldy ma? Ekibastuz, Rıdder sııaqty qalalar qandaı tarıfpen tólem jasaı bastaıdy?» dep surady BAQ ókilderi.
Mınıstrdiń aıtýynsha, tarıf saıasaty ár kásiporynnyń jeke jaǵdaıyna baılanysty belgilenbek.
«Men bul týraly birneshe ret aıttym, ıá belgili bir ósim boldy. Bul naqty tabıǵı monopolııa sýbektisine baılanysty bolady. ıAǵnı, halyqqa qyzmet kórsetetin, qýat kózin usynatyn nemese qýat kózin alatyn uıymǵa baılanysty. Jelilerdiń tozý kórsetkishine de baılanysty bolady. Mysaly, Ekibastuz jylý elektr ortalyǵy ótinim berdi. Olar tarıfti bir mezette 107 paıyz kóterýdi surady. Biz ondaı qadamǵa bara almaımyz, ony ózderine ashyp aıttyq. Ósim budan 4 ese kem bolatyn shyǵar. Olarmen birge shamamen osylaı jumys istep jatyrmyz. Birinshiden, Ekibastuz jylý elektr ortalyǵynyń ıesi de jaýapkershilikti arqalaýy kerek – ınvestıtsııa salýǵa tıis. Shyǵynnyń bir bóligi bıýdjetke, bir bóligi turǵyndarǵa túsedi. Ádiletti tásil bolý kerek. Sonda ósim baıaý júredi», - dedi ol.
Mınıstr jylý júıesindegi problemasy qaıta-qaıta syr berip jatqan Ekibastuz ben Rıdderdiń jaǵdaıyna jeke toqtaldy.
«Ekibastuzda júıe múldem tozyp bitken. Eń úlken ósim sol jaqta josparlanǵan. Eki eseden joǵary bolady. Biraq biz ony basqa mehanızmder arqyly tejeýdi josparlap otyrmyz Ekibastuz ben Rıdderde ósimdi baıaý júrgizgimiz keledi. Mysaly jylýdyń jańa tarıfi bul qalalalardyń turǵyndaryna naýryz aıynda seziledi. Sáýirde naýryz aıynyń túbirtegi keledi. Ol kezde kún jylyna bastaǵan soń jylý az tutynylady. Sáıkesinshe tarıftiń óskenin naýryz aıy men sáýirdiń jartysynda ǵana sezinedi. Odan keıin ósimdi keler qysta bir-aq sezinýi kerek. Jylýǵa tólenetin birinshi túbirtek qarasha aıynda keledi. Tarıftiń ósimin turǵyndar sáýirde sezinedi sonda», - dedi Álibek Qýantyrov.
